Esnabideko lanak udal lizentziarik gabe egin dituztela salatu du Eguzkik
Indarrean dagoen ingurumen legeria ahalik eta irmoen aplikatzeko eskatu dio Eguzkik udalari.
Esnabiden egiten hasi diren lanen gaineko salaketa zabaldu zuen pasa den hilabetean talde ekologista eta antinuklearrak SEO Bird Life kolektiboarekin batera. Bertan bizi diren hegaztiak eta ziren zuhaitzak, fauna eta biodibertsitatea atzera bueltarik gabeko egoerara eramatea salatu zuen, hegaztien ugaltze garai betean egiten hasi zirelako, eta balio handiko zuhaitzak moztu dituztelako. Eragin latza izango duen zalantzarik ez du eragile ekologistak.
Besteak beste, berderoiak, karnabak, zozoak eta tamaina handiko haritza eta gaztainondoak daude bertan.
Haserre hori areagotu egin zaio orain Eguzkiri, ingurumenarekiko eta biodibertsitatearekiko ondorio larriak izango dituzten lanak ezinbestekoa den udal lizentziarik gabe egin dituztela jakin duenean. “Udalean egin beharreko kudeaketak egin ostean izan dugu horren berri”. Indarrean dagoen araudia urratuta egin dituztela lan horiek salatu nahi du talde ekologistak, “publikoki eta ozen”. Ez da ordea, salaketara mugatu Eguzkiren ekinbidea eta udalari urratze larriaren aurrean zein neurri hartu dituen edo hartuko dituen galdetu dio, baita indarrean dagoen ingurumen legeria ahalik eta irmoen aplikatzeko eskatu , “kontuan hartuta legez kanpoko jarduera horrek inguruko fauna eta floran izan dituen ondorio negatiboak”.
