Muskulo taldeak 'Esan Gabe' doa diskoa aurkeztuko du
Alabergako Goiko plazan 19:30ean izango da kontzertua, eta eguraldi txarra egingo balu, Koldo Mitxelena ikastetxeko jolastoki estalira lekualdatuko dute.
Muskulo taldeak bere azken lana aurkeztuko du larunbatean. Ander Fernandez, Iker Fernandez, Oskar Moran eta Oscar Mansok osatzen duten taldeak Esan gabe doa diskoa atera dute aurten eta emanaldia eskainiko dute Alabergako Goiko plazan. 19:30ean izango da kontzertua, eta eguraldi txarra egingo balu, Koldo Mitxelena ikastetxeko jolastoki estalira lekualdatuko dute. Bizi Errenteria programaren barruan antolatu du udalak Muskulo taldearen kontzertua.
Muskulo taldeak duela sei urte abiatu zuen bere ibilbidea Dejabu Panpin laborategiaren Arrastoak antzezlanerako sortu zuen Domino kantuarekin. Triku bat errepidean argitaratu zuen ostean eta Trenplin lehiaketa irabazi. 2017an lau kantuko albuma argitaratu eta Lau proiektua martxan jarri zuen; lau zinema zuzendarik kantuei bideoklip bana sortu zioten.
Emanaldirako gonbidapen sarrerak behar dira, doakoa bada ere emanaldia. Gehienez lau sarrera eskura daitezke pertsonako, eta horretarako online edo Niessen Kulturguneko harrerara joan behar da bihar 12:00ak baino lehen.
