Pasaialdea biziberritzeko neurri sorta iragarri du aldundiak
Pasaia, Lezo eta Errenteria-Oreretako udalerrietan hainbat hirigintza lan egingo dira; haien artean, San Pedroko lonja inguruko urbanizazio lanei amaiera ematea dago aurreikusita.
Rafaela Romero foru diputatua, gaur goizeko prentsaurrekoan. 
Rafaela Romero foru diputatu sozialistak iragarri duenez, Pasaia, Lezo eta Errenteria-Oreretako udalerriak “biziberritzeko” 2 milioi euro inbertituko ditu Gipuzkoako Foru Aldundiak. Zenbateko horren banaketa eremu bakoitzaren egoera eta beharren arabera egin da: Pasaiak 434.000 euro inguru jasoko ditu, Errenteria-Oreretak 100.000, eta Lezok 50.000 euro.
Pasaiaren kasuan, besteak beste, honako lanak egingo dira:
- Uren tratamenduarekin zerikusia duten lanak, Donibanen.
- Irisgarritasuna hobetzeko obrak Juandaburun, J.J. Otaegin eta Lurdes Txikin.
- Harmailaren berritzea, Gure Zumardian.
- Oinezkoentzako eta bizikletentzako bideetako mantenu lanak, Trintxerpe eta Herrera artean.
- San Pedroko lonjaren lanek barne hartzen dute Esnabide kalearen alde bat egokitu eta arrantza eremuko plaza urbanizatzea.
Lezo eta Errenteria-Orereta udalerriei dagokienez, aurreikusitako irisgarritasun eta mugikortasun jarduketak egingo dira, Ijurko eta Beraun auzoetako igogailuetan. Romerok argi utzi nahi izan du iragarritako jarduketen ardatz nagusiak hiri biziberritzea, ingurumen iraunkorra eta mugikortasun iraunkorra direla. Hauekin, “Gipuzkoan Pasaialdearekin eta bertako herritarrekin dugun zor historikoari aurre egiteko dugun borondatea” erakutsi nahi da.
Aipatutako neurriez gain, diputatuak azaldu nahi izan du Aldundiak lanean jarraitzen duela Portuko Agintaritzarekin, Hospitalilloko aparkalekua eta Adinberri erreferentzia zentroa eraikiko diren lursailetan.
