Pasaia Kayak bigarren sailkatu da Euskadiko Txapelketan

Larunbatean lehiatu ziren itsas piraguistak Hondarribiko uretan, eta urrezko bi domina eta brontzezko bat lortu zituen guztira talde pasaitarrak.

Rebeka Ruiz

Pasaia

2020/08/03

Itxialdia bukatu ondorengo lehen lehia egin zuten Euskal Herriko itsas kayak taldeek larunbatean, Hondarribian. Itsas kayakeko Euskadiko Txapelketa jokatu zuten udalerrian, eta Pasaia Kayak taldea kluben arteko lehiaketaren txapeldunorde sailkatu zen azkenean.

Piraguistek 13 kilometroko ibilbidean jokatu zuten proba: Jaizkibelgo errotaren inguruan kokatuta zegoen ziaboga bakarra eta Hondarribiko Arraun Elkartearen pantalanean helmuga. Ipar-mendebaldeko haize nahasiak lehia bizia eragin zuen. Hori horrela, Lander Rodriguez pasaitarrak proba osoa buruan eman ondoren, hirugarren postua lortu zuen azkenean, Antton Araneta taldekidearen aurretik, eta Donostia Kayak taldeko Ruiz de Aretxabaletaren eta Zumaiako Itxas-Gain taldeko Villagarciaren atzetik, 1.01.51 markarekin, irabazlearengandik 40 segundora.

Tarragona eta Jaffet [Irudia: Pasaia Kayak]

Emakumeen proban, bestalde, Amaia Benavente ordezkari pasaitarra gogor aritu zen Atletico San Sebastian taldeko Cristina Iraeta gainditzeko. Bi kirolariak errenteriarrak dira izatez eta lehia estuan aritu ziren, Benaventek olatu artean bere trebezia erakutsi zuen arte. Azkenean, 1.12.35 denbora lortuta garaipena eskuratu zuen Benaventek, 1.35 minutuko errenta irabazita Iraetari.

Seniorren K2 kategoria mistoari dagokionez, Carlos Jafet Urruzola eta Sara Tarragona izan ziren irabazle. Pasaia Kayak klubetik egindako lanari balioa eman nahi izan diote, «haien estreinaldiko proban eskarmentua eskatzen zuen egoerari aurre eginez».

Lehiaketa amaitzerako, bigarren izan zen taldekako sailkapenean Pasaia Kayak, Zumaiako Itxas-Gain txapeldunaren atzetik eta Hondarribiko Amuitz Outrigger Kanoa Klubaren aurretik ohorezko podiuma osatuz.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.