Berrogei urtetik gorako etxebizitzak birgaitzeko diru-saila handitu du Jaurlaritzak
Eraginkortasun energetikoa, irisgarritasuna eta segurtasuna hobetzeaz gain, lehen aldiz balkoiak eta terrazak sortzea edo handitzea aurreikusten dute diru-laguntzek.
Iztieta auzoan hainbat dira azken urtean fatxadak berritu dituzten eraikinak. Eusko Jaurlaritzako Etxebizitza Sailak 40 urtetik gorako etxebizitzak birgaitzeko aurrekontua handitu duela ezagutarazi du Oarsoaldeko Garapen Agentziak ohar baten bidez. Horrela, eraginkortasun energetikoa, irisgarritasuna eta segurtasuna hobetzeaz gain, lehen aldiz balkoiak eta terrazak sortzea edo handitzea aurreikusi du Jaurlaritzak Renove Programa Integralaren barruan.
Hori horrela, diruz lagundu daitezkeen jarduketak dira, besteak beste: fatxadak edo teilatuak isolatzea, galdarak ordeztea, igogailuak jartzea, atarietan zero kotako obrak egitea eta sarbideetan oztopo fisikoak kentzea, aireztapen sistemak ezartzea beroa berreskuratzeko, eta inguratzaile termikoa hobetzea.
Gainera, diru-laguntzak esleitzerako garaian lehentasuna izango dute batetik, Birgaitze Integratuko Eremuetan edo Bizitegi Eremu degradatuetan kokatutako birgaitze proiektuek, eta bestetik, Ezkerraldeko, Meatzaldeko edo Oarsoaldeko udalerrietan kokatutakoek. Hala, gehienez, 25.000 euroko diru laguntza jasoko du etxebizitza bakoitzak.
Eskaerak digitalki izapidetu behar dira ondoko helbide elektronikoan irailaren 9a baino lehen.
