Igogailuen inguruko adierazpenak PSE-EEk egin zituela gogorarazi dio EAJk alkateari
Jeltzaleen udal taldeak «arduraz» jokatu duela adierazi eta sozialisten adierazpenak ez zirela oposizio osoaren izenean izan gogoratu dute.
Egoerak haserrea eragin du herritarren artean, jeltzaleen diotenez.
Alabergako eta Galtzarabordako igogailuen matxura dela-eta zenbait zehaztapen egin nahi izan ditu EAJren udal taldeak komunikabideetara igorritako ohar baten bidez. Lehenik eta behin, gobernu taldearen aurkako adierazpenak PSE-EEk egin zituela gogorarazi dio Aizpea Otaegi alkateari eta ez oposizioak bere osotasunean. Bigarrenik, tokiko agintariak «arduraz» jokatzeko galdegin zuenean, jeltzaleek «une oro erabateko erantzukizunez» aritu direla gai honen inguruan argudiatu du Elixabet Murua bozeramaileak.
Hori horrela, alkateak egindako adierazpenak ez zirela «egokiak» izan leporatu dio EAJk: «Ulergaitza egiten zaigu egoera honen aurrean udal agintari gorenak gainerakoei erantzukizuna eskatzea eta beregain bat ere ez hartzea». Areago, EAJren udal taldeak egoera ulertzen duela azaldu du Muruak, «hirugarrenen esku» baitago ezinbestekoak diren piezak iristea. Hori dela eta, mantenua burutzen duen enpresan jarri du ardura, eta esleipenak egiteko irizpideak bestelakoak izan beharko liratekeela iradoki du.
