Lapurreta egotzita bi gizon atxilotu dituzte Lezo-Errenteriako tren geltokian
Treneko segurtasun zerbitzuko langileek musukorik ez zeramatela-eta Ertzaintzara deitu zuten. Ordiziako taberna batean ustez lapurtzeagatik atxilo eraman zituzten 21 eta 26 urteko bi gazteak azkenean.
![Lezo-Errenteria Renfe tren geltokia](https://oarsoaldea.hitza.eus/site/files/2020/08/renfe_geltokia.jpg)
Ertzaintzak 21 eta 26 urteko bi gizon atxilotu zituen asteazkenean (hilak 5) goizeko 06:45ean, Lezo-Errenteriako Renfeko tren geltokian. Plazaratutako informazioaren arabera, bi gazteek musukorik gabe bidaiatzen zutela-eta Ertzaintzara abisua pasa zuten geltokiko segurtasun zerbitzuko beharginek. Haien gauzen artean, besteak beste, tableta bat, hainbat telefono mugikor eta zenbait txanpon-blister topatu zituzten.
Segurtasun zerbitzukoei galdetuta, gazteak Ordizia ingurutik zetozela adierazi zieten agenteei. Oriako ertzain-etxearekin kontaktatu ondoren taberna batean izandako lapurretagatik salaketa baten berri izan zuten ertzainek. Horren arabera, lokala indarrez ireki zuten lapurrek, eta tableta bat eta 350 eurotik gora txanpon-blisterretan eraman zituzten.
Ordiziako lapurretan ustez parte hartzea egotzita atxilo eraman zituzten bi gizonak eta atzo utzi zituzten epailearen esku.