Banderarik ez Oarsoaldeko ontzientzat
Azken jardunaldiaren ondoren, ETE ligako San Juango ontziak eta KAE1 ligako San Pedrokoak sailkapen orokorraren bigarren postuei eustea lortu dute.
![San Pedrok sailkapen orokorraren bigarren postuari eustea lortu du [Irudia: Jabiruloo].](https://oarsoaldea.hitza.eus/site/files/2020/08/san_pedro.jpg)
San Pedrok sailkapen orokorraren bigarren postuari eustea lortu du [Irudia: Jabiruloo]. Oarsoaldeko eskifaiek ez dute banderarik eskuratu asteburuan jokatutako azken jardunaldietan, nahiz eta San Juango emakumeek eta San Pedroko gizonek sailkapen orokorraren bigarren postuan kokatzea lortu duten.
Lehenik eta behin, ETE ligako Hibaika eta San Juan XXXVI. Ondarroako Bandera Itsakorda Saria eskuratzeko lehia bizian aritu ziren larunbatean, eta III. Donibane Lohizune Ziburuko Ikurrina lortzeko borroka egin zuten igandean. Lehen estropadan Errenteria-Oreretako ontziak bosgarren postuan bukatu zuen 11:10:75 denbora eginez; San Juango eskifaia bi segundo beranduago sailkatu zen azkenean.
Atzoko jardunaldiari erreparatuta ordea, maila ezin hobea erakutsi zuten bertako arraunlariek. Izan ere, San Juanek bigarren sartzea lortu zuen 11:33:36 marka eginda, eta zortzi segundora helmugara iritsi ondoren, Hibaikak bete zuen hirugarren lekua. Arrosak sailkapen orokorraren bigarren postuan daude, eta gorriak, seigarrenean.
KAE1 eta KAE2 ligak
KAE1 ligako traineruek XI. Getariako Estropada eta ligaren seigarren jardunaldia Getxoko uretan jokatu dituzte asteburuan, larunbatean eta igandean, hurrenez hurren. San Pedroko ontziak bigarren postua eskuratu zuen bi estropadetan, 20:21:66 eta 20:52:50 markak lortuz eta sailkapen orokorraren bigarren postua betez.
San Juango eskifaia bere aldetik, bosgarren sartu zen Getarian eta laugarren Getxoko lehian, 20:44:47 eta 21:08:27 denborekin. Atzoko emaitzari esker sanjuandarrak bosgarren postuan kokatzea lortu zuten.
KAE 2 ligari dagokionez, Hibaikako arraunlari taldeak XI. Zarautz Arraun Elkartearen Ikurrina eta XXVIII. Donibane Lohizune Ziburuko Estropada parte hartu zuen asteburuan. Bi kasuetan zortzigarren postua eskuratu zuen Errenteria-Oreretako ontziak, eta sailkapen orokorraren zortzigarren lekuan kokatuta dago.
