Tokiko merkataritza, ostalaritza eta zerbitzuak diruz lagunduko ditu udalak
COVID-19 gaitzak eragindako galerak arintzeko helburuarekin, sektorera bideratzeko 250.000 euroko diru-laguntza programa onartu du Pasaiako Udalak.
Osasun krisiaren eragina arintzeko udalak diruz lagunduko du merkataritza, ostalaritza eta zerbitzuen tokiko sektorea. Koronabirusak eragindako kalteei aurre egiteko 250.000 euroko diru-saila onartu du Pasaiako Udalak. Tokiko merkataritza, ostalaritza eta zerbitzuen sektorera bideratuta egongo dira diru-laguntzak. Galerak arintzeaz gain, «gure merkataritzan, ostalaritzan eta zerbitzuetan jarduerari eta enpleguari eustea da xedea», Izaskun Gomez alkateak zehaztu duenez.
Diru-laguntza eska dezaketenen artean daude langile autonomoak eta hamar behargin baino gutxiago dituzten merkataritza, ostalaritza eta zerbitzu enpresak. Milioi bat euro azpitik fakturatu beharko dute eskatzaileek, nahitaez ixtera behartuak izan direnen artean egon beharko dira, edota 2019ko urritik 2020ko martxora arte diru-sarrerak %75 murriztu zaizkiela frogatu beharko dute. Dena beteta, 800 euroko diru-laguntza jasoko dute, eta langile kopuruaren arabera, 100 euro edo 200 euro gehituko zaizkie.
Diru-laguntza izapidetzeko udalaren erregistro elektronikoan edo Hiritarren Arreta Zerbitzuan (HAZ) egin beharko dute interesdunek.
