Antton Aranetak bigarren postua eskuratu du Donostia-Pasaia-Donostia zeharkaldian

Piraguistak lan ezin hobea egin zuen bigarren lekua defendatzeko. Sailkapen orokorreko bigarren postuan mantentzea lortu du Pasaia Kayak taldeak.

Rebeka Ruiz

Pasaia

2020/08/11

Pasaia Kayak taldeko Antton Aranetak bigarren postua eskuratu zuen larunbatean Donostiako Klub Nautikoak antolatutako Donostia-Pasaia-Donostia proba klasikoaren XVIII. ekitaldian. Pasaia Kayak taldeak bigarren lekua lortu zuen sailkapen orokorrean. Larunbateko lehia Euskadiko Koparen barruan jokatuko den proba bakarra da, beste hiru iragarrita bazeuden ere, Itsas Kayak taldetik aurreratu dutenez.

Antton Araneta Pasaia Kayak-eko piraguista [Irudia: Pasaia Kayak]

Araneta piraguista [Irudia: Pasaia Kayak]

Larunbatean izandako tenperatura altuak medio, antolatzaileek ibilbidea laburtzea erabaki zuten, guztira 10 kilometro eskaseko saioa prestatuz, ibilbideko ziaboga bakarra Emisario buian emanez, Animetako puntaren parean. Irteerak multzoka eman ziren pilaketak ekiditeko, eta klubetik azaldu dutenez, lehen irteera horietan bildu ziren faborito guztiak «garaipen bila». Orduantxe itsasoratu zen Araneta, eta pasaitarren aukerarik nabarmenena zela argi utzi zuen, bigarren postua gogoz defendatuta eta 47:24 marka lortuta. Ezin izan zuen Aranetak Itxas Gain Zumaiako taldeko Jose Maria Villagarciaren ihesaldia eteteko ezer egin, bai ordea bere postua borrokatu: «Atzetik zituen lehiakideen erasoei ondo eutsi zien Aranetak, gogor estutu bazuten ere, eta oso sasoi onean dagoela erakutsi zuen oraingo honetan ere, joan den asteko Euskadiko Txapelketan bezalaxe».

Iñigo Loisek, Carlos Jefetek eta Beñat Rodalek egindako «lan txukuna» ere nabarmendu dute kayak elkarteko kideek, eta Iker eta Unai Alonso anaiek egindako estreinaldia txalotu dute, «esperientzia hartzeko oso baliagarria izango zaie».

Euskadiko Txapelketan bezala, Pasaia Kayak bigarren izan zen Donostian izandako lehian. Hau izango da denboraldi honetako azken proba, klubetik adierazi dutenez.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.