Ateak ireki ditzake berriz ere Gailur tabernak, udalak baieztatu duenez
Positibo bakarra atzeman dute langileen artean, eta beraz, desinfekzio lanak bukatuta, kutsatutako pertsonarekin harreman esturik izan ez duten beharginak lanean has daitezkeela diote erakundeek.
Gailur tabernak astelehenean irekiko ditu ateak.
Hilaren 6an erabaki zuten Gailur tabernako arduradunek ateak ixtea bertako zerbitzarietako batek Donostiako Ramuntxo Berri tabernako agerraldiarekin harremana izan zuelako eta. Gaurkoan, Errenteriako Udalak eta Eusko Jaurlaritzako Osasun Publikoko Zuzendaritzak tabernako ateak berriz ere ireki daitezkeela baieztatu dute komunikabideetara bidalitako oharrean.
Zabaldutako informazioaren arabera, establezimenduko langile guztiek, batek izan ezik, negatibo eman dute PCR probetan. Kutsatze komunitarioa ote dagoen ikertzen hasteko, langile horren harremana gainontzeko beharginekin aztertu dute, txandak, oporraldiak eta bestelako irizpideak baloratuz. Hori horrela, soilik lan egin ahal izango dute kutsatutako zerbitzariarekin harreman esturik izan ez duten langileek. Gainontzekoak, berrogeialdia egin beharko dute hurrengo PCR probetan berriro negatibo eman arte.
Hortaz, establezimenduan desinfekzio lanak bukatuta, kutsatutako pertsonarekin harreman esturik izan ez duten langileek ekin ahal izango diote jarduerari berriz ere.
«Eskerrak» arduradunei
Errenteriako Udalak Gailur tabernako arduradunen jarrera txalotu nahi izan du «azkar» eta «erantzukizunez» jokatzeagatik. Erakunde publikoen agindurik jaso gabe taberna ixteko erabakia medio «eskerrak» eman nahi izan dizkie udalak arduradunei, baita sare sozialetan informazioa «gardentasunez» emateagatik ere.
Bezeroei, bestalde, lasaitasun mezua igorri die udal gobernuak: «Gailur tabernako sei langileetatik bakarra kutsatu den neurrian, Osasun Publikoak ez du kutsatze komunitariotzat jotzen bertan gertatutakoa, eta ondorioz, ez ditu beharrezkoak jotzen bezeroei PCR probak egitea».
Gailur tabernako arduradunek astelehenean zabalduko dutela establezimendua adierazi dute euren sare sozialetan, eta bezeroez «harro» daudela erantsi.
