Arditurriko tren berdeak zerbitzu gehiago eskainiko ditu hil honetan
Datozen bi asteetarako erreserbak beteta daudela eta, hilaren 20ean eta 27an ere zerbitzua emango du trenak.
Arditurriko tren berdea Doneztebe plazatik abiatzen da. Asteazkenero dabil tren berdea Oiartzungo Done Eztebe plazatik Arditurri meategira bidaia egiten. Dagoeneko ia laurehun lagunek hartu dute trena, eta datozen bi asteetako erreserbak beteta daudela ikusirik, hilaren 20ean eta 27an zerbitzua emango duela ezagutarazi du Oarsoaldea Turismoa agentziak.
Hala, asteazkenetan bezala, ostegunetan ere bi txanda eskainiko ditu: lehena, 10:00etan eta bigarrena, 11:15ean. Doneztebe plazatik abiatzen da trena eta 45 minutu inguruko bidaia egiten du Arditurriraino. Hara iristean kaskoak jantzi, meazuloan sartu eta 180 metroko pasabidea zeharkatuko dute bisitariek gida batek lagunduta.
Tren berdea eta bisita egiteko interesa duten lagunek aldez aurretik erreserba egin beharko dute Oiartzungo turismo bulegoan (Aialde kalea, 2), ondoko posta elektronikoan, webgunean, edota 943 50 89 13 telefono zenbakian.
