Getxoko uretan egongo da asteburuko lehia
Bizkaiko banderak etxera ekartzeko helburuarekin lehiatuko dira asteburu honetan Oarsoaldeko traineruak.
San Juango gizonen ontzia sailkapen orokorreko seigarren postuan dago [Irudia: Josu Z.] ETE, KAE1 eta KAE2 ligetako traineruak Getxoko uretan lehiatuko dira asteburuan. Hibaikako eta San Juango emakumeen traineruek zein San Pedrokoak, sailkapenaren goialdean dauden arren, postua hobetzeko maila eman beharko dute beste behin.
V. Emakumeen Bilboko Ikurrina eta XXXIII. Erandioko Bandera jokoan egongo dira ETE ligako ontzien artean, bihar eta etzi (18:00), hurrenez hurren. Sailkapen orokorreko hirugarren postuan dago Hibaika, eta laugarrenean, San Juan.
KAE1 eta KAE2 ligek XVII. Algortako Portuzarra Ikurrina izango dute eskuragarri larunbatean Getxon. Igandean, berriz, 10. jardunaldia izango dute KAE1 multzokoek, eta Antton Bilbao Bandera KAE2koek. Lehen multzoko traineruak 19:00etan lehiatuko dira bi egunetan, eta bigarrenekoak, aldiz, 17:00etan.
Uneotan, KAE1eko sailkapen orokorreko bigarren postuan dago San Pedro, eta seigarrenean San Juan. KAE2ko zortzigarrena da Hibaika.
