Pasaiako Udalak diru laguntzak eskainiko dizkie ostalariei, COVID-19ari aurre egiteko
Koronabirusaren ondorioz merkataritza eta ostalaritzan egiten ari diren inbertsioak, ekipamenduak eta azterlanak diruz lagunduko ditu udalak. Eskaerak irailaren 15a arte aurkez daitezke, eta gehienezko kopurua 5.000 eurokoa izango da.
Pasai Donibaneko Santiago plaza. 
Pasaiako Udalak iragarri du diruz lagunduko dituela COVID-19ak eskatzen dituen osasun eta segurtasun neurriei aurre egiteko merkatari eta ostalariek egiten dituzten inbertsioak. Ia 44.000 euroko diru-laguntzak eskainiko dira guztira, eta eskaerak egiteko epea zabalik egongo da irailaren 15a arte. Laguntza bakoitza 5.000 eurokoa izango da, gehienez, establezimendu bakoitzeko; aldi berean, gutxieneko inbertsio zenbatekoa 150 eurokoa izan beharko da.
Programaren helburua da beharrezkoak diren inbertsioak, ekipamenduak eta azterlanak diruz laguntzea, lokalak eta lan egiteko moduak behar berrietara egokitzeko; hau da, segurtasun- eta osasun-protokoloak bete daitezen ziurtatzeko asmoz, ekipamenduetan inbertsioak egin daitezen bultzatzea. Diruz lagundu daitezkeen kostuak honako hauek dira:
- Lokalak eta laneko moduak egokitzea.
- Segurtasun eta osasunaren irizpideak betetze aldera, lokalak moldatzeko egindako inbertsioak.
- Bezero zein hornitzaileekin harreman berriak antolatze aldera, laneko moduak egokitzeko inbertsioak.
Onuradunak
Diru-laguntzen onuradunak merkatari eta ostalariak izango dira, nor bere kontura lan egiten dutenak nahiz langile autonomoak, edo 10 langiletik beherako enpresa txikiak, haien negozio zifra milioi bat eurokoa baino gehiagokoa ez baldin bada. Esandakoekin batera, beste hainbat baldintza ere bete beharko dituzte onuradunek, horiek guztiak nahiz aurkeztu beharreko dokumentazioa, besteak beste, hemen klik eginez kontsulta daitezke.
