Lezoko EH Bildu: "Gaur-gaurkoz, Osasun Sailetik ez da jaso gomendio edo agindurik Tiñelun izan direnek PCR proba egiteko"
Larunbatean aurkeztu zuen Lezoko EH Bilduk hauteskundeetarako zerrenda. Lezoko alkateak azken egunetan Tiñelun izan direnei PCR proba egin behar dutela eskatu diela-eta Lezoko EH Bilduk hainbat argibide eman nahi izan ditu. EH Bilduk emandako informazioaren arabera, PCR probak egitea eskatzearen erabakia alkatearena izan da. Osasun Sailetik, koalizioko kideek adierazi dutenez, ez dute eman gisa horretako gomendio edo aholkurik: “Gaur-gaurkoz, Osasun Sailetik ez da jaso gomendio edo agindurik Tiñelun izan direnek PCR proba egiteko”. Koalizioko kideek atzo iluntzean eman zuten informazio hori: “Udaletik zabaldutako informazioak zehaztasunik ez izateaz gain, herritarren artean nahasmena eta alferreko alarma sor dezake”.
Zabaldu duten oharraren asmoa da, koalizioko kideen arabera, “arduraz eta erantzukizunez” jokatzeko deia egitea: “Herritarrei informazio zuzena, argia eta osoa emanez eta alarma egoerarik sortu gabe”.
Tiñeluko zuzendaritzako kideek atzo jakin zuten bertako langile batek PCR proban positibo eman zuela. Hilaren 24tik, ordea, bai taberna eta elkartea itxita zituzten, langileak susmoa zuelako infekzioa izan zezakeela. Atzo baieztatu zen haren positiboa. Horren ondorioz, beste langileek atzo bertan egin zituzten PCR probak, eta emaitzaren zain daude (gaurko espero dituzte).
“Proba horien emaitzen arabera zehaztuko dira, Osasun Sailetik ezarritako protokolo eta irizpideen baitan, eman beharreko hurrengo urratsak. Edozein kasutan, bestelako neurriak hartu beharko balira, jakinaraziko dela ziur izan”, esan dute Lezoko EH Bilduko kideek.
Koalizioak adierazi du lehen unetik Osasun Sailarekin harremanetan dagoela Tiñeluko zuzendaritza batzordea: “Handik jasotako irizpide eta protokolo guztiak betetzen ari da. Tiñeluko zuzendaritza izaten ari den jokaera arduratsua aipatzeaz gain, herritarrak gardentasunez informatu eta lasaitasun mezua zabaldu nahi dugu”.
