Lasaitasunerako deia egin du Tiñeluk: ez da positibo gehiagorik langileen eta haien hurbilenekoen artean
Alkateak ostiralean egindako adierazpenak ez zirela egokiak izan uste du elkarteak. Ixteko edo PCR proba masiboak egiteko agindurik ez dutela jaso esan du Tiñeluk
Ostiralean Tiñeluko langile baten COVID-19agatik positiboa baieztatu ondoren, atzo, elkarteak berak esan zuen gainontzeko langileek eta haien zenbait kontaktu estuk, PCR proba egin ondoren, negatibo eman dutela. “Informazio guztiarekin, lasaitasunari eusteko momentua dela adierazi nahi genizueke”, esan du elkartearen zuzendaritza batzordeak, HITZAra bidalitako oharrean. Prebentzio neurri gisara, eta PCR proba guztiak egin bitartean, elkartea eta taberna itxita zituzten. Hala jarraituko dutela baieztatu dute Tiñelutik, “prebentzio neurriekin jarraituko dugu egoera lasaitu bitartean”.
Gainera, elkarteko ordezkariek irmo esan dute ez dutela jaso inongo agindurik elkartea eta taberna ixteko. Eta ostiralean alkateak ohar bidez esandakoaren kontra, Tiñelun izan ziren bezeroei PCR proba egiteko Osasun Sailaren eskaerarik ez dago; erakunde horrek adosten ditu, behar balira, gisa horretako proba masiboak tokian tokiko erakundeekin (Tiñelurekin, dagokion osasun zentroarekin eta Lezoko Udalarekin kasu honetan), ustezko kutsatze komunitarioak egon daitezkeenean. Zentzu horretan, Tiñelutik ezinegona adierazi dute alkateak ostiralean zabaldu zuen informazioagatik.
Tiñeluko zuzendaritza batzordea: “Gure kezka, ordea, azken honen baitan sortu da. Alkateak OARSOALDEKO HITZA eta DIARIO VASCO bitartez egin duen komunikazioa ez dela egokia izan adierazi nahi genuke. Herrian piztu den alarma egoerak arduratuta gauzkala aitortu nahi dizuegu, bizi dugun osasun larrialdi honetan informazioaren elkarbanatze egokiak duen garrantzia azpimarratu nahi genukeelarik. Ikuspegi politikoak alde batetara utzirik herriaren onura eta osasuna lehenetsiz elkar hartzeko eskaera luzatu nahi genioke udal gobernuari”.
Hori horrela, elkartekideek adierazi dute COVID-19agatik izan duten kutsatu bakarraren kasuan “komunikazio zuzenaren eta argiaren garrantziaz jabeturik gardentasunez” jokatu dutela, “birusaren edatzea gelditzeko eta herritarron lasaitasunerako jarrera egokiena dela argi izanik”.
Bazkideei eta herriari orokorrean, mezua helarazi diete: “Egoera honi aurre egiteko gure borondatea eta prestutasuna azaltzearekin batera, osasuna eta lehenbailehen egoeraren normalizazioa opa dizuegu. Birusak baldintzatu duen egoera orokor honetan gero eta prestatuagoak egon behar dugu. Elkar har dezagun”.
