David tabernak ateak itxi ditu langile bat COVID-19arekin kutsatu delako
Eskerrak eman dizkie udalak tabernaren arduradunei, "azkar eta erantzukizunez jokatuko dutelako; taberna itxi zuten langilearen egoeraz jabetu eta berehala, erakundeen agindurik jaso aurretik".
David taberna artxiboko irudi batean. Iztieta auzoko Donostia kaleko David Tabernak ateak itxi ditu. Bertako langile bat COVID-19an positiboa izan delako. Orain, gainontzeko langileek PCR probak egin beharko dituzte, eta tabernaren arduradunek, lokala desinfektatu egin beharko dute. Osasun Publikoko ze4rbitzuak, bertan gertatutako ez dela kutsadura komunitarioa izan ondorioztatu du, eta hortaz, bezeroek ez dituzte PCR probak egin beharko.
Tabernako gainontzeko langileei probak eginda eta lokala desinfektatuta Eusko Jaurlaritzaren Osasun Publikoko zuzendaritzak eta udalak konfirmatu beharko dute berriro zabal dezaketela establezimendua.
Eskerrak eman dizkie udalak tabernaren arduradunei, “azkar eta erantzukizunez jokatuko dutelako; taberna itxi zuten langilearen egoeraz jabetu eta berehala, erakundeen agindurik jaso aurretik”.
Ostalaritzako COVID protokoloa
Ostalaritzan kutsadura kasu bat agertutakoan nola jokatu behar den ekarri du gogora udalak. Kutsatutako langilearekin harreman estua izan duten langileak identifikatu beharra dago lehenik, “oporrak edo txandak tarteko, zeintzuk ez duten harremanik izan. Kutsatutako pertsonarekin harreman esturik ez eta PCR proban negatibo izan diren langileek bakarrik zabal dezakete establezimendua”. PCR proban negatibo izan arren, kutsatutako langilearekin harreman estua izan duten langileek, berriz, berrogeialdia egin beharko dute, eta bigarren PCR proba batean negatibo izan lanera itzuli ahal izateko.
Ezinbestekoa da, halaber, establezimendua desinfektatzea. Hori kontratatutako enpresa batek, edo establezimenduko langileek egin dezakete, betiere, COVID-19 protokoloan baimendutako produktuak erabiliz.
