San Pedrok helburuak bete ditu: play-offa eta bandera
Castrotik bigarren postu bat eta garaipen bat ekarrita, konfiantza handiarekin ekingo diote irailaren 19 eta 20an egingo den igoera kanporaketari.
San Pedroko arraunlari eta zaleak, atzo, ospakizunetan herrian. Argazkia: Sanpedrotarra AE. Handiek bezala bete ditu San Pedrok asteburuko helburuak. Lehentasuna Eusko Label Ligan aritzeko play-offa behin betiko eskuratzea zen; eta erraz lortu du mailako bigarren postua. Bigarrena, Castron egindako bi estropadetan banderaren bat lortzea zen; hori ere, zakura. KAE1 Liga bukatu da, eta San Pedrok ezarritako nahiak erraz beharbada ez, baina lasaitasunez bete ditu. Gainera, banderak ere astindu ditu.
Larunbateko estropadan bigarrena izan zen Libia ontzia, sasoi osoan maiz aurretik izan duen Pedreñaren atzetik. Ordurako jada patrikan zuen play-offa, igandean kataklismo handirik ezean. Eta ez zen ezustekorik izan atzo. Are gehiago: Castro Hiriko XLVIII. Bandera herrira ekarri zuten, Pedreñari 12 segundoko aldea aterata, eta hirugarren izan zen Camargori 16koa. Erraz kanpotik begiratuta, baina ahaleginez beteta traineruaren barrenetik so eginda.
Hortaz, KAE1eko sailkapen nagusiak bigarren izan dira moreak 10,83ko puntuen batezbestekoarekin. Pedreña lehenak 11,58ko koefizientea lortu du. Getaria hirugarrena urrun, 8,70ekin. Hala, irailaren 19 eta 20an (Bermeon eta Portugaleten), Eusko Label Ligara igotzeko play-offa jokatuko du KAE1eko irabazle Pedreñarekin, Eusko Labelen 11. izan den Zarautzekin, eta Galiziako Ligan lehen biak izan diren Tiran eta Meirarekin batera. Bost traineru, eta bi plaza.
Noski, kanporaketa horren aurretik Kontxako sailkapen estropada dute, ostegunean (17:30). Zaila du San Pedrok bertan egotea. Ez da aurtengo helburua, ordea.
San Juan
San Juanen gizonen traineruak bukatutzat eman du ligen aroa asteburuan. KAE1eko sailkapen nagusian seigarren postuarekin konformatu behar izan dira arrosak (7,33ko puntuen batezbestekoarekin), Castroko bi estropadetan bosgarren (atzo) eta zortzigarren (larunbatean) izan ondoren. Kontxako sailkapen estropadan izango dira ostegunean. Izan liteke lehia hori sasoiko azkena izatea Erreka-rentzat.
