Hibaikak lortu du Kontxarako txartela
Zazpi txartel zeuden jokoan, eta horietatik azkena lortu dute errenteriarrek eta hilaren 6an eta 13an Kontxako Bandera eskuratzeko lehian arituko dira.
Hibaikako arraunlariak Kontxarako sailkatu direla jakiteko unean. Hibaika Kontxako Banderan lehiatuko diren ontzien artean zegoen kiniela guztietan, eta ez du hutsik egin. Zazpi txartel zeuden jokoan, eta horietatik azkena lortu dute errenteriarrek eta hilaren 6an eta 13an Kontxako Bandera eskuratzeko lehian arituko dira. 11:37:96ko denbora egin du Amaia Gezalak gidatzen duen tripulazioak gaurko erlojupekoan, lehenengo sailkatu den Oriok baina 28 segundo gehiago behar izan dituzte lana amaitzeko. Kontuak kontu, denbora alde batera utzita, gaurkoan txartela eskuratzea zen helburua eta Hibaikak eskuratu du.
Inge Ugarte aritu da Patroi lanetan. Adierazpenak egin ditu estropada amaituta eta pozik azaldu da Kontxan izango direlako, baina aitortu du ez dela gaur egin dutena nahi zuten estropada: “Ez da izan denok nahi genuen estropada baina gaurko helburua bete dugu, sartzea zen, eta lortu dugu”.
Igandeari begira jarri da patroi gaztea. Orduan jokatuko da Kontxako Banderako lehen jardunaldia. Argi esan du Hibaikakoak: “Indar eta gogo handienarekin etorriko gara arraunera, dena ematera; ikusiko duguz er gertatzen den”.
ETE Ligan ari diren traineruei aitortza egin die azkenik Ugartek, “ikusi da badugula gure maila”.
Errenteria-Orereta beraz, Donostian izango da, Kontxako Bandera etxera ekartzen saiatzeko lehian. Zaleek aurten etxetik animatu beharko dituzte Hibaikako arraunlariak.
Gaurko sailkapen estropadaren denbora guztiak, hemen.
