Sanjuandarrak, Kontxara
San Juan Koxtape A.E.-ko emakumeak seigarren izan dira Kontxako Banderako sailkatze estropadan. Oarso Bidasoako hiru traineruek lortu dute igandeko jardunaldirako pasea.
Seigarren sailkatu dira Kontxako Banderan. 
Arrosak urteko bandera garrantzitsuenean egongo dira, seigarren sailkatu baitira Kontxako Banderarako sailkapen estropadan. Denboraldi honetako emaitzek ez zituzten apustuak arrosen alde jartzen, baina pronostiko guztien aurka, eta estropada ederra jokatu ostean, euren txartela lortu dute pasaitarrek, zazpi plazetako bat lortuz. Ez zuten espero, baina Kontxan dira arrosak. Zorioneko plan aldaketa.
Azken luzea erabakigarria izan da, Ondarrutarrekin lehian ibili ostean, 11 segundoko abantaila atera baitiete azken hauei, sailkapenetik kanpo utziz bizkaitarrak, eta ondoan, plaza ematen zuen zazpigarren postuan Hibaika. Oarso Bidasoko hiru traineruak (Hondarribia, Hibaika eta San Juan) sailkatu dira gaurko jardunean.
Emakumeen ezohiko Kontxako Bandera honetan ez da zalerik egon, baina uretako giroan ez da aldaketarik izan. Joan den urtean 20 traineruk parte hartu zuten lehiaketa honetan, aurten 15 izatea zegoen aurreikusita, baina haietako 2 (Lapurdi eta Deusto, hain zuzen) ezin izan dira aurkeztu COVID-19agatik kutsatutako kideren bat atzeman dutelako. Hortaz, 13 izan dira Kontxan egoteko borrokari ekin diotenak, eta haietako 7 bakarrik sailkatzea lortu dutenak, hurrenez hurren: Orio, Tolosaldea, Donostia Arraun Lagunak, Zumaia, Hondarribia, San Juan eta Hibaika. Horiei Donostiarra gehitu behar zaie.
Gaurko denbora guztiak xehetasunez ikusteko, sartu hemen (PDF artxiboa da).
