Esnabideko hirigintza garapenean 'gardentasun eza' salatu dute
Eguzkik eta Beraun, Galtzaraborda, eta Kaputxinoak auzoetako 180 bizilagunek alegazioa aurkeztu zutela ekainaren 19an Esnabideko Xehetasun Azterlana onartzeko espedientean azaldu du talde ekologista.
Eguzkik eta Erreteria-Oreretako zenbait auzok gardentasun eza salatu dute Esnabideko hirigintza garapenean. Hala jakinarazi du Eguzki talde ekologistak prentsa ohar bidez. Eguzkik berak eta Beraun, Galtzaraborda, eta Kaputxinoak auzoetako 180 bizilagunek alegazioa aurkeztu zutela ekainaren 19an Esnabideko Xehetasun Azterlana onartzeko espedientean azaldu du talde ekologistak, Plan orokorraren berrikuspena egin arte kudeaketa eta antolamendu dokumentu ororen izapidetzea eteteko eskatuz. Errenteriak plan hori 2012an berrikusi behar zuela gogorarazi du taldeak, “zortzi urteko atzerapena daramagu beraz, plangintza herritarren benetako beharretara egokitzeko”.
Alegazioa aurkeztu zuten unetik udalaren erantzunaren baten zain izan direla zehaztu du Eguzkik, “eta abuztuaren 19an heldu zen, bi hilabetera. Uztailaren 20ko osoko bilkuran aho batez onartu zela Xehetasun Azterlana jakinarazi zigun. Gaiaren muinean sartu gabe, egiaztatu da zenbait kudeaketa egin direla, baina ez dugu horiei buruzko informaziorik izan”. Azken hori, gardentasun ezaren erakusgarria argia dela dio talde ekologistak, “gauzak gaizki doaz pentsatzen badute nahitaez Gipuzkoako Aldizkari Ofizialean argitaratzen diren erabakiak jakinaraztea gardentasunaren sinonimoa dela. Erabakiak hartu aurretik herritarren parte hartzea ahalbidetzea eta bultzatzea da benetako gardentasun ariketa”.
Ekainaren 30ean aurkeztu zuten idatziari noiz erantzungo zain dela esan du Eguzkik “oraindik”, “idatzi horretan, besteak beste, eremu horretan lizentziarik gabeko lanak egitearen inguruan egin ziren edo egitea aurreikusi ziren ekintzak ezagutzea eskatu genuen”. Lan horiek, ekainaren 17an salatu zituen Eguzkik Seo Bird Lifekin batera.
