Pasaitarrak animatu dituzte "euskara bere egin dezaten"
Pasaiako Udalak Antxoko eta Trintxerpeko euskaltegiekin elkarlanean landutako matrikulazio kanpaina aurkeztu dute. Datorren ikasturterako izen ematea zabalik da.
Ezkerretik eskuinera, Udane Migeltorena (AEK), Loreto Osa (Euskara zinegotzia), Ainara Miranda (euskaltegiko ikaslea), Jose Zelaia (euskaltegiko ikaslea), Antton Cuadrado (Euskara teknikaria) eta Susana Garro (Udal Euskaltegia). 
Pasaiako Udalak herriko bi euskaltegiekin (Antxoko Txirrita AEK eta Trintxerpeko Udal euskaltegia) elkarlanean landu duen aurtengo matrikulazio kanpaina aurkeztu dute gaur, Gudari Plazan izandako agerraldi batean.
Loreto Osa Euskara zinegotziak eman dio hasiera bilkurari, pasaitarrak animatu nahi izan ditu “euskara bere egin dezaten, euskaragile izan daitezen” eta, horretarako, euskara ikasteak izan ditzakeen abantailak nabarmendu ditu, haien artean euskal kultura bete-betean gozatzeko aukera eta lan eremuan hizkuntzaren ezagutzak eskaintzen dituen abantailak.
Beharrei egokitutako eskaintza
Bi euskaltegiek erabiltzaileen egoera eta behar espezifikoetara egokitutako ikastaroak eskainiko dituzte, ordutegi malgu eta metodologia berritzaileekin.
Laguntza ekonomikoak ere eskainiko zaizkie, eta haietako askorentzat, asistentziaren baldintzak betez gero, doakoa izan daiteke euskara ikastea. Horren ildotik, egoera ekonomiko zaurgarrienean daudenek %20a bakarrik ordaindu beharko dute, eta eskola orduen %85a betez gero udalak kopuru hori itzuliko lieke.
Ikasleen esperientzia
Udane Migeltorenak (AEK euskaltegia) aurtengo matrikulazio kanpainaren berezitasun nagusiaren berri eman du: Pasaiako euskaltegietan dabiltzan bi ikasleren esperientziak jaso dira mikro-dokumental banatan. 5 minutu inguruko iraupena duten bideoak ikusgai egongo dira hurrengo egunetan.
Susana Garrok (Udal Euskaltegia) iragarri du aurreko urteetako ikastaro berezien eskaintza mantenduko dela, familiei, merkatariei, bereziki mintzamena landu nahi dutenei… espresuki zuzendutakoak (informazio guztia irakurgai dago udalaren webgunean). Aldi berean, gogorarazi nahi izan du COVID-19aren aurkako segurtasun neurri guztiak hartuko direla euskaltegietan, behar berrietara egokitzeko.
Informazio gehiago eskuratzeko edota izena emateko herriko euskaltegietara edo HAZ bulegoetara hurbil daitezke interesdunak.
