Presentzialki eta era mailakatuan hasiko ditu klaseak musika eskolak
Indarberriturik eta ikasleekin aurrez aurre jarduteko ilusioarekin hasiko du ikasturtea Errenteria Musikal Udal Dantza eta Musika Eskolak.
Errenteria musikaleko ikasleak. Indarberriturik eta ikasleekin aurrez aurre jarduteko ilusioarekin hasiko du ikasturtea Errenteria Musikal Udal Dantza eta Musika Eskolak. Hori bai, COVID-19ak agendan eragina izango du, eta era mailakatuan hasiko du ikasturtea. Asteazkenean hasiko dute ikasturtea musikako banakako instrumentu klaseen kasuan, eta gradu profesionaleko ikasgai guztiak, banda eta orkestra izan ezik. Ezarritako protokoloaren harira, gainera, irakaslea ikaslearen edo taldearen bila ate nagusira jaitsiko da klase hasiera eta amaieran eta gurasoak ezingo dira eraikinera sartu.
Musika, dantza eta antzerkiko gainerako saio eta ikasgai guztiak irailaren 23an hasiko dira.
Musika eskolan COVID-19ari aurre egiteko ondu duten kontingentzia plana, datozen egunetan iritsaraziko zaiela ikasleei azaldu dute gainera arduradunek.
Kontziliazioa
Zaintzak duen garrantzian jarri du azpimarra musika eskolak. Bide horretan, ekarpena egin nahirik hilaren 9an eta 22a bitartean kontziliazio arazoa eduki dezaketen gurasoei haurra dagokion saioaren ordu tartean eskolara eramateko aukera zabaldu dute. Aukera hori, benetan beharra dutenek erabiltzea eskatu dute, osasun krisiaren ondorioak minimizatu nahi dituztelako. Beharra dutenek. hilaren 8ko 13:00ak arteko tartea dute mezua bidaltzeko posta elektronikora. mezuaren gaian kontziliazioa idatzi, eta ikaslearen izen abizenez gain, saioa adierazi beharko da.
