[Galeria eta bideoa] 'Seabin' itsas-zaborrontziak Pasaiako urak garbituko ditu
Itsas hondakinen bilketa egiteaz gain, datu zientifikoak lortzeko eta sentsibilizaziorako ere baliatuko da gailua. Mater Museoan egin da proiektuaren aurkezpena.
'Seabin Pasaia' gailuaren aurkezpen ekitaldia, Mater Ontzi Museoan. 
Mater Ontzi Museo Ekoaktiboak ‘Seabin Pasaia’ izeneko proiektu berritzailea aurkeztu du gaur, itsas ingurumen-sentsibilizazio eta hezkuntzarako lan ildoan. Bertan izan dira Foru Aldundiko eta Portu Agintaritzako arduradunak ere. Gailu honi esker, Pasaiako badian dauden ur gainazaleko hondakinak bildu (1,4 tona urtean) eta hauen jarraipena egin ahal izango du Materrek; itsas-zakarrontzia Bizkaiko Golkoan lehena da, eta mundu osoan beste 860 daude.
Atzo jarri zen martxan lehen aldiz ‘Seabin’ gailua Pasaiako uretan, Torreatzeko pantalanean, hain zuzen ere. Gaur egindako aurkezpenean, Mater ontzian proiektuaren nondik norakoak aurkezteaz gain, itsas-zakarrontziak goizean zehar bildu dituen hondakinak ere erakutsi dituzte iniziatibaren arduradunek, haien artean, plastikozko botilak, freskagarri-potoak, arrantza egiteko soka zati bat, eta mikro-plastikoak (poliuretano zatiak) atzeman dira.
Gailua (itsas hondakinekin) uretatik ateratzeko unea ikus dezakezu honako bideo honetan.
Funtzionamendua
Eguneko 24 ordutan zehar zaborra bilduko du ‘Seabin Pasaia’-k. Mater Museoa egunero arduratuko da hura husteaz eta hondakinak biltzeaz, gero jasotako hori asteburuan aztertu ahal izateko. Begi bistaz atzeman daitekeen zaborraz gain, mikro-plastikoak, nahiz olio poluitzailea ere bilduko ditu gailuak.
Asteburuan bildutako hondakin horien analisiak ahalbidetuko du ez soilik Pasaiako ur-gainazalean dagoen hondakin kopurua zein den ezagutzea, baita zabor horren tipologiari buruzko aldizkako datuak biltzea ere. Horri esker, arazo global honen iturriak identifikatzeko ikerketan aurrerapauso garrantzitsuak eman ahal izango dira.
Gaurko aurkezpen ekitaldian argi utzi dute zaborrontzi berritzaileak hiru funtzio nagusi izango dituela:
- Garbiketa. 1’4 tona zabor bilduko ditu urtean.
- Zientzia. Hondakinen tipologia, kantitatea eta jatorria aztertuko dira.
- Sentsibilizazioa eta hezkuntza. Materren helburu nagusia herritarrak kontzientziatzea izango da.
Gaurko agerraldiaren argazkiak ikusgai, hemen:
