Servinirekiko atxikimenduen 'bonbardaketa' lortu nahi dute
Argentinako epaitegira gutun bidalketa masiboa antolatu dute Servini epaileari babesa erakutsi eta Rodolfo Martin Villa epaitu dezala eskatzeko.
Inpunitate osoa dute 1936ko Espainiako Gerran, frankismoan eta ondoren trantsizioa deitu zen hartan egin ziren sarraskien arduradunek. 40 urteko diktadurapean egin zituzten izugarrikeriak ezin ditu, gainera, egungo sistema juridikoak epaitu, Amnistia Legea ezarri zutelako helburu horrekin. Milaka biktima dira. Ezin dute, ordea, ezer erreklamatu, ez egia, ez justizia ezta erreparazioa ere.
Egoera hori izanik, eta inpunitatearekin amaitzeko, nazioartera jo zuten 2010. urtean frankismoak hil eta desagerrarazitakoen senideek; nazioarteko jurisdikzioak bakarrik ikertu eta epaitu ditzakeelako genozidio eta gizateriaren aurkako krimenak. Egun, 400 kasutik gora barnebiltzen ditu Argentinako Kereilak,eta horren barruan Rodolfo Martin Villa ministroaren inpunitatearekin amaitzea eskatu dute, besteak beste. Hilabete hasieran galdekatu du Maria Servini epaile argentinarrak Martin Villa . Argentinako kereilak genozidioa eta gizateriaren aurkako krimenak egozten dizkio.
1976-1979 bitartean, UCD alderdia gobernuan zela, Espainiako Gobernazio Ministroa izan zen. Karguan zela, Espainiako poliziak jokabide bortitza izan zuen Hego Euskal Herrian. Horren adibide dira, Gasteizko martxoaren 3ko sarraskian eta 1978ko Sanferminak.
Espainiako Estatuko lau presidente ohik, Felipe Gonzalez, Jose Maria Aznar, Jose Luis Rodriguez Zapatero eta Mariano Rajoik gutuna helarazi zioten Servini epaileari Martin Villari babesa adieraziz, hari deklarazioa hartu aurretik. Frankismoko biktimen elkarteek eta senideek, frankismoko krimenak ikertzen ausartu den epaile bakarren kontrako presiotzat jo dituzte gutun horiek. Horren aurrean, Servini epaileari babesa erabatekoa adierazteko eta Martin Villa epaitzeko eskatzeko kanpaina abiatu dute, Servinirekiko atxikimendu “bonbardaketa” erraldoia lortzeko.
Errenteria-Oreretako herritar talde batek bat egin du protestarekin eta babes kanpainan bat egitera deitu dituzte herritarrak. Hiru gutun eredu prestatu dituzte, elkarteei, erakundeei eta norbanakoei begirakoa. Gazteleraz daude guztiak, Argentinako epaitegietara bidali behar direlako. Behin idatziak beteta, posta elektronikoz bidaltzeko eskatu dute. Gutun ereduak, Goldatu elkartearen webgunean aurkitu daitezke.
Errenteriako Udalaren kereila
Errenteriako Udalak iazko urte amaieran aurkeztu zuen bere kereila, Argentinakoaren barruan txerta zezaten eskatuta. Oinarrian, 1936ko Espainiako Gerran gertatu zenaren ikerketak argitara atera dituen izen-abizen eta gertaeren zerrenda luzea, eta aurretik Memoria partekatu baterantz ikerketak 1956 eta 2012 urteen artean dokumentatu ahal izan dituen urraketak, besteak beste. Garazi Lopez de Etxezarreta Argentinan izan zen iaz Argentinako Kereilaren barruan lanean ari diren beste elkarteetako kideekin batera eta gaiaren gaineko elkarrizketa egin zion HITZA-k.
