"Emakumeok geure eskubideen jabe egiteko" eskola martxan da
Pasaiako Jabetze Eskolan izena emateko epea zabalik da, hilaren 25a arte. Aurtengo eskaintzak ez ditu COVID-19ak eragindako erronkak bazter utzi.
Izen ematea zabalik izango da gaurtik hasi eta hilaren 25a arte. 
Pasai Donibanen egindako agerraldian Jabetze Eskola-Udazkena 2020 aurkeztu dute Pasaiako Udalak eta herriko emakume elkarteek, elkarlanean. Bilkurarekin bat egin nahi izan dute, aldi berean, Trintxerpeko Topaketa taldeko hainbat kidek. Aurkezpen ekitaldian bina ikastaro eta tailer, hiru talde eta gune bat aurkeztu dituzte. Plangintzaren barne hartu da, halaber, konfinamenduak pasaitar emakumeengan izan dituen askotariko eraginak lantzeko laborategia. Izen ematea zabalik izango da gaurtik hasi eta hilaren 25a arte.
Loreto Osa Euskara eta Gizarte Ekintza zinegotziak udazkeneko ikasturtearen berri eman du: autoestimua, emozioak eta jabekuntza, mindfulness-a, autodefentsa feminista, teknologia berrietan ahalduntzea… izango dira, besteak beste, aurtengo formakuntzen ardatz. Eskaintza guztia, ordutegiak eta bakoitzaren kokalekua kontsulta ditzakezu, hemen klik eginez. Nahiz eta Jabetze Eskolako tailerretan parte hartzea doakoa den, zinegotziak nabarmendu nahi izan du izena ematea derrigorrezkoa dela (inskripziorako eskuorria HAZ bulegoetan edo webgunean eskura daiteke).
Saioa Iraola Berdintasun teknikariak hartu du hitza aurtengo ikasturtearen hiru ardatz nagusien berri emateko:
- Lehena, eta aurtengo erronka nagusia, Pasaiako emakumeak eta COVID-19a izenekoa (bi laborategi eta lan saio zabal bat).
- Bigarrena, bizikidetza, elkartasuna eta elkar ezagutza sustatzeko taldea (orotariko emakumeen artean sareak sortzeko xedez).
- Azkena, betiko ildotik, indarkeriari aurre egiteko, prebentzioa eta autodefentsa; bereziki nerabe eta gazteei zuzendutako tailerra.
Amaitzeko, Izaskun Berbierrek (Bekoz Beko elkarteko kide) Jabetza Eskola osatzen duten emakume elkarteen izenean hitz egin du aurtengo eskaintzak derrigorrezko segurtasun neurriak beteko dituela (gehienez 15 pertsona elkartuko dira) nabarmendu eta Pasaiako emakumeei parte hartzeko deia eginez: “Anima zaitezte, ez etxean gelditu!”.
