Puntu ilunik gabeko oinezkoen bideak eskatu ditu Eguzkik
Argiztapen eta mantenu egokia eskatu ditu talde ekologistak oinezkoen joan etorriak eta bizikletaren erabilera sustatzeko Oarsoaldeko lau udalerrietan.
Eguzkik puntu ilun gisa identifikatutako eremuaren argazkia. Argazkia: Eguzki Oinezkoentzako bide seguru eta egokiak eskatu ditu Eguzkik. Ibilbide horiek, mantenu eta argiztapen egokiarekin mantentzea ezinbestekotzat jo du talde ekologistak oinezkoen joan etorriak eta bizikletaren erabilera sustatzeko. Horri begira, eskaera zehatza egin die Oarsoaldeko lau udalei: “Bidegorriak eta oinezkoentzako bideak egoera onean daudela zaintzeko”. Horien mantenua eta dituzten argiztapen baldintzak ez direla egokiak dio Eguzkik, eta neurriak hartzea eskatu die Errenteria, Pasaia, Lezo eta Oiartzungo udalei. Eskaeraren helburua argia da: “Oinezkoentzat bideak hobetzea eta pasealekuak indartzea”.
Egoera orokorrean hobetu beharrekoa dela nabarmenduta, puntu zehatz bati egin dio erreferentzia Eguzkik puntu ilun gisa: Kaputxinoen Gaina kaleko bide irtenaren azpitik pasatzen den oinezkoentzako pasabidea, GI-636 elkartzen den puntuaren eta Errenteriako Oiartzun Ibaiaren gainetik igarotzen den biaduktoaren artean. Lezo eta Pasai Antxo artean doan pasealekua da, Kaputxinoetako biribilgunea eta Lezokoa zuzenean lotzen dituena Nafarroa etorbidetik eta Errenteriako erdigunetik pasa behar izan gabe.
Hirigunetik isolatutako eremua da, portu barrutiaren mugakidea, eta pasealekua erabat isolatua dago: “Argiztapen gutxi du eta hiri mantenu falta du. Zoladuraren egoera txarra da, belar txarrak ugaritu dira, eta jendeka bertan utzitako edo botatako hondakinak aurkitu daitezke, besteak beste”.
Bertatik pasatzerakoan, oinezkoak halakoak saihesten joan behar dutela azaldu du talde ekologistak, “ustekabe ugari izateko arriskupean pasatzen dira bertatik”.
Gauez oso jende gutxi ausartzen dela bide hori erabiltzen erantsi du.
Eskaera zehatza egin dio Errenteriako Udalari Eguzkik: Argiak jartzea, hiri mantenu egokia ziurtatzea, eta oinezkoen pasabidea ixten ari den landareria garbitzea”.
Oarsoaldeko gainontzeko hiru udalei ere egin die eskaera talde ekologistak: “Ahalegina egin dezaten eskatzen diegu, herritarren artean segurtasun falta sortzen duten puntu ilunak desagerrarazteko, gure eskualdean oinezkoen joan etorriak eta bizikletaren erabilera sustatzeko”.
