Udalak gertutik jarraituko du Cristobal Gamon ikastetxeko eta Jesusen Bihotza egoitzako kasuen bilakaera
Adinekoen egoitzako egoiliar bat hil da azken orduetan eta COVID-19an positibo izan diren 17 egoiliar daude; Cristobal Gamon ikastetxean berriz, lau gelako ikasleak daude konfinatuta, bost positibo atzemanda.
Argi urdinak udaletxean, osasungintza publikoko langileei aitortza egiteko. Joan den martxokoa da argazkia. Gaur jakinarazi du Gipuzkoako Foru Aldundiak Gabierrotan kokatutako Jesusen Bihotza egoitzan COVID-19an positiboa izan den egoiliar bat hil dela. Azken egunetan bere osasun egoerak hala eskatzen zuelako ospitalera bideratutako egoiliarretako bat zen hil den errenteriarra. Tristuraz hartu du berria udalak, eta prentsa ohar bidez, elkartasun osoa azaldu dio Jesusen Bihotza egoitzari berari eta hildako egoiliarraren senideei. Adinekoen egoitzan, gainera, azken orduetan COVID-19an bi positibo gehiago hauteman dituztela jakinarazi du; guztira 17 dira kutsatutako egoiliarrak egoitza horretan.
Azken orduetan jakinarazi dute halaber, Cristobal Gamon ikastetxeko lau ikasgela itxi eta hainbat ikasle konfinatuta daudela. COVID-19agatik kutsatutako ikasle gehiago izan daitezkeenik ez dute baztertu, “eta litekeena da gela gehiago itxi, ikasle gehiago konfinatu eta PCR proba gehiago egin behar izatea”, nabarmendu du udalak prentsa oharrean. Kutsatutako ikasleak bost dira une honetan.
Jesusen Bihotza adinekoen egoitza Gipuzkoako Foru Aldundiak kudeatzen du, eta Cristobal Gamon ikastetxea, Eusko Jaurlaritzak, hala ere, bai egoitzarekin bai ikastetxearekin ere harreman estua duela esan du udalak, eta horrenbestez, gertutik jarraituko duela kasuen bilakaera, “Cristobal Gamon ikastetxea eta Jesusen Bihotza egoitzaren egoera gertutik jarraituko dugu, kudeaketa udalari ez badagokio ere, biekin harremana gertukoa delako”.
