Ezer Gaizkiko jabeak lasaitasunerako deia egin du: "Tabernan ez da fokurik izan"
Jabeak COVID-19an positibo eman du eta taberna itxita dago. Argi utzi nahi izan du, baina, berea dela kasu bakarra eta establezimenduan ez dela inongo infekzio-fokurik izan.
Ezer Gaizki taberna, itxita. 
Herrian kutsatzeari buruz izandako hainbat zurrumurruri erantzunez, Antxoko Ezer Gaizki tabernako jabeak argi utzi nahi izan du establezimenduan ez dela agerraldirik egon, bera baita bertako langileen artean COVID-19an positibo eman duen bakarra: “Guztiz ezinezkoa da infekzio-foku bat egotea tabernan”.
Kutsapena tabernakoa ez den senitarteko batekin kontaktuan egon izanagatik gertatu zen, baina ostatuko arduradunak nabarmendu nahi izan du euren arteko kontaktua lokaletik kanpo eman zela, eta, beraz, bezeroek ez luketela kezkatzeko arrazoirik izan behar. Haren positiboaren berri pasa den igandean izan zuen, eta astelehenean, beste ahaide batek sintomak erakutsi zituenean, egin zuen jabeak testa; ordutik, tabernak itxita dirau.
Horrez gain, zehaztu nahi izan du badirela jabearekin zuzenean kontaktuan izan diren bezeroak zeinak euren kabuz PCR proba egitea erabaki duten, eta emaitza negatiboa eman dute. Ezer Gaizkin segurtasun eta osasun neurriak zorrotz bete direla argi utzi nahi izan du, musukoa erabili baitu bezeroekin kontaktuan egon denetan, eta horrexegatik lasaitasun mezua helarazi nahi izan die gertukoei.
