Lezoko VIII. Garagardo Festa 2021ean izango da, aurten ez
Antolatzaileek adierazi dute COVID-19ak erabat baldintzatu duela euren jarduna, eta herritar nahiz boluntarioen osasuna lehentasun izan dute.
Lezoko Garagardo Festa antolatzen duen Tiñelu elkarteak erabaki du bertan behera uztea aurtengo edizioa. Beraz, VIII. ekitaldia 2021era atzeratu beharrean izan dira, COVID-19ak sortutako egoeragatik. “Ditxosozko COVID-19 birusak hankaz gora jarri dizkigu aurreikuspen guztiak. Hau horrela, eta egungo egoera ikusita, aurtengo garagardo festa bertan behera uztea erabaki dugu”, esan dute antolatzaileek.
Erabakia hartzerakoan, lehentasun nabarmen bat izan dutela kontatu dute antolatzaileek: “Erabateko lehentasuna guretzat da parte hartzaileen eta boluntarioen osasuna bermatzea. Gaur-gaurkoz ezinezko zaigu hori ziurtatzea”.
Aurreko edizio guztietan era batera edo bestera festaren barruan lanean izan direnei eskerrak eman dizkiete, “zuei esker egin dugu festa hau, herritik eta herriarentzat”. Eta zaintzeko eskatu diete lezoarrei. “Datorren urtean ukondotxo eta garagardo artean egingo dugu topa”.
