Mugikortasun Plana izango du lehenengoz Lezok
Bi fasetan egingo dute plana. Lehenean mugikortasun alorrean egun Lezok bizi duen egoeraren gaineko azterketa eta diagnosia osatzea da asmoa.
Donibanerantz doan bidegorriaren zati bat. Lezoko Udalak datozen urteetan mugikortasun arloan izango dituen ekintzak jaso eta antolatzeko, Lehen Mugikortasun Plana lantzen ari dela jakinarazi du udalak, udal erakundeko Ingurumen eta Trantsizio Ekologiko Sailaren bitartez. Azken helburua, “udalerri osasuntsuago, iraunkorrago eta seguruago bat eraikitzea” da. Azken urteetan egin diren hirigintza lanen jarraipena izatea nahi dute plana, tartean oinezkoentzat soilik diren kaleak, bidegorriak, edo kontzientziazio jarduerak egin direlako.
Udala sinetsita dago lezoarren bizi kalitatean eta jarduera sozioekonomikoan eragina duela mugikortasunak. Gainera, azken urteetako demografia, azpiegitura eta hirigintza aldaketak kontuan hartzekoak direla nabarmendu du tokiko gobernuak. Horien gaineko gogoeta sakona egiteko aukera da plana egitea, udalaren aburuz.
Bi fasetan ari dira garatzen plan hori. Lehenean egungo egoeraren azterketa eta diagnosia egingo dituzte, mugikortasun arloan dauden erronka nagusiak identifikatzeko. Hori eskuan, ekintza planaren txanda izango da.
Gauzak horrela, Ingurumen eta Trantsizio Ekologiko zinegotzi Jose Angel Sanchezek adierazi du plana egiteko lezoarren parte hartzea ezinbestekoa dela, herritarrena eta eragileena. Gainera, udal sailen arteko koordinazioa egon behar dela zehaztu du.
Mugikortasun Planaren hainbat xede zerrendatu ditu Sanchezek:
- Lezo guztian zehar herritar ororen irisgarritasuna bermatzea, edozein dela mugitzeko aukeratzen duten garraiobidea.
- Garraio kolektiboa indartzea eta motorrik gabeko mugikortasuna sustatzea, bereziki bizikletaren erabilera.
- Bide zein herritarren segurtasuna hobetzea.
- Gas kutsagarrien emisioak – berotegi efektua eragiten dutenak, esaterako- eta zaratak murriztea.
- Energia-kontsumoa murriztea eta energia eraginkortasuna hobetzea.
- Hiri ingurunea erakargarriagoa egitea eta bertako biztanleen eta bisitarien bizi-kalitatea hobetzea.
