[Bideoa] Sanjuandarren beharrak beti geroko uztea egotzi dio EH Bilduk udalari
Turismoaren eta bisitarien masifikazioari aurre egiteko neurriak faltan bota ditu udara honetan Pasaiako alderdiak. Herriaren orotariko beharrak 'Noiz arte?' izeneko bideo batean bildu dituzte egoera ikusarazteko.
Pasaiako EH Bildu, Pasai Donibanen. 
Pasaiako EH Bilduk uste du Pasai Donibaneko premiazko beharrak asetzeak luze joko duela, udal gobernua “utzikerian erdi lo eta noraezean” baitabil, euren arabera. Egoera honek noiz arte iraungo ote duen galdetu nahi izan diote, publikoki, Pasaiako Udalari, izan ere, herritarren premiak beti geroko uzten dituztela uste dute, haien artean: Garbiketa, udaltzaingoaren presentzia ahula, puntetara doan bidearen itxiera, komun publikoak…
Nabarmendu nahi izan dute uztailean Pasaiako EH Bilduk hainbat proposamen egin zituela egoerari aurre egiteko, eta baita gai horiek lantzeko batzorde berezi bat osatzea proposatu ere. Dena den, “jakina denez, ez da nahikoa izan”, eta arazoek konponbiderik gabe jarraitzen dutela salatu dute, aipatutakoez gain, baita Lezorantz doan bidegorriaren egoera, sanjuandarrek behar duten aparkatzeko sistema berezitua, saneamendurako beharrezkoa den proiektua, edota motora lurralde garraio egituran uztartzeko premia ere.
Aipatutako orotariko arazoak irudikatzeko ‘Noiz arte?’ titulupean bideo bat sortu du alderdiak.
