'Espetxea COVID garaian' hitzaldia antolatu du Sare Herritarrak
Pandemia barrutik nola bizitzen ari diren, zein eragina izaten ari den presoengan zein haien senide eta lagunengan aztertuko dute hilaren 30ean, eta hausnarketarako bidea zabaldu, Sare Herritarrak antolatu duen hitzaldiarekin.
Bisita eta aurrez aurrekorik gabe dira presoak azken bi asteetan, eta prentsa ere ez dute jasotzen Covid-19aren harira ezarritako konfinamenduarengatik. COVID-19ak hankaz gora jarri du egunerokoa. Kalean hori nabaria bada, zer esanik ez espetxean. Gutunak, prentsa, bisitak, aurrez aurrekoak, telefono deiak… Horietako bakoitza da arnasaldi presoarentzat. Isolatuta daudenentzat, isolamendua areagotzea suposatu du pandemiak konfinamenduan bisitarik, aurrez aurrekorik, eta prentsarik gabe izan direlako. Pandemia barrutik nola bizitzen ari diren, zein eragina izaten ari den presoengan zein haien senide eta lagunengan aztertuko dute hilaren 30ean, eta hausnarketarako bidea zabaldu, Sare Herritarrak antolatu duen hitzaldiarekin.
Merkatuzarrek hartuko du hitzaldi hori eta bertan arituko dira, hizlari, Martin Iriberri Martuteneko kapilaua, Urtzi Errazkin Etxerat elkarteko bozeramailea, eta Libertad Frances Salhaketako kidea. Moderatzaile lanetan, berriz, Arantxa Urbe arituko da.
COVID-19aren osasun larrialdiaren harira abian diren segurtasun eta higiene protokoloak beteko dira hitzaldian, eta antolatzaileek gogorarazi dute, ezinbestekoa dela muxukoa soinean izatea hitzaldian.
Batzarra
Hitzaldia hilaren 30ean izango da, baina aurretik badu beste hitzordu bat Sare Herritarrak. Hilaren 26an (larunbata) batzarrera deitu du 11:00etan Xenpelar Aretoan. Batzar irekia da, eta azken iniziatiben gainean hitz egiteaz gain, izan bidea dinamikaren nondik norakoak aztertu eta datozen iniziatibak aurkeztuko dituzte.
