San Juanen domina festa bateletan
Gipuzkoako eta Euskadiko txapelketen artean urrezko zortzi domina, zilarrezko bi eta brontzezko beste hiru lortu dituzte arraunlari sanjuandarrek.
Sanjuandarren batel bat, atzo, Legution. Argazkia: San Juan-Koxtape AE. Gipuzkoako eta Euskadiko batel txapelketak egin dira asteburuan Legution (Araba). Berez, apirila hasieran ziren egitekoak txapelketa horiek, baina COVID-19aren osasun krisiagatik atzeratu egin ziren. Eta bertan klub bat gailendu behar bada, San Juan-Koxtape da.
Gipuzkoako Txapelketan (larunbatean) lau urrezko domina lortu zituzten arrosek: nesken Promesa Mailan, nesken eta mutilen Gazte Mailan, eta gizonen Senior Mailan. Txapelketa horretan hiru zilarrezko lortu zituzten sanjuandarrek, nesken nahiz mutilen haurretan eta mutilen Gazte Mailan (Yolaren izenean). Hirugarren izan ziren, brontzezkoarekin, mutil kadeteak.
Hibaikak, bere aldetik, ez zuen dominarik lortu Gipuzkoakoan. Nesken Haur Mailan laugarren izan ziren, nesken promesetan bezala. Mutilen Kadete Mailako ontzia seigarren geratu zen, eta Gazte Mailan ere bosgarren izan ziren mutilak.
Trintxerpe-Illunbek hiru ontzi aurkeztu zituen herrialdeko lehiara. Mutilen Har Mailakoa laugarrena izan zen bere kategorian, mutilen Gazte Mailakoena seigarren. Senior Mailan, gizonetan, hirugarren izan zen trintxerpetarren batela.
Euskadikoa
Euskadiko Txapelketa igandean (atzo) izan zen. HITZAk soilik San Juan-Koxtapek publiko egindako datuak izan ditu eskuragarri. Eta izugarri onak dira datuak: Euskadiko Txapelketan, batel arrosek urrezko lau domina (nesketan kadeteetan eta gazteetan, mutiletan infantiletan eta Gazte Mailan) eta brontzezko hiru (neska infantiletan eta senior gizonetan) eskuratu zituzten.
Bateletan, asteburu biribila San Juan-Koxtaperentzat.
