Euskal presoak etxeratzea eskatuko du LABek
Urgentziazko erantzuna eskatzen du euskal presoen aferak, eta hala zabalduko du lau haizetara LAB sindikatuak ostiralean.
Errepresaliatuak eta larri gaixo daudenak etxeratzea eskatzeko banderak. Etxean eta bizirik nahi dituzte. Urgentziazko erantzuna eskatzen du euskal presoen aferak, eta hala zabalduko du lau haizetara LAB sindikatuak ostiralean. Horretarako elkarretaratzera deitu du 12:00etan Errenteria-Oreretako Herriko Plazan 12:00etan Euskal Presoak etxean eta bizirik nahi ditugu lelopean.
Dispertsio politikaren berezko gogortasunak, presoak beraiek eta senide eta lagunak zigortzen ditu, ehunka kilometroko eta hamaika orduko bidaiak egitera kondenatzen baititu senide eta lagun presoekin kristal arteko 40 minutuko bisita edo aurrez aurrekoa egin ahal izateko. Zigor horri, COVID-19aren pandemiak ezarri duen ezjakintasun agertokia gaineratu behar zaio. Konfinamendu garaian, bisita, aurrez aurreko eta prentsarik gabe izan dira presoak, eta une honetan, Espainiako Estatuko 30 espetxe baino gehiagotan bisitak debekatu dituztela salatu zuten duela bi egun Etxerat elkarteak eta Sare Herritarrak: “Euskal presoei ezartzen dieten urruntze politika eta salbuespen neurriak horien giza eskubideen urraketa etengabea bada, COVID-19aren pandemiak larriagotu egin du urraketa egoera hori”.
Sei preso, 3.630 kilometro
Oreretako sei euskal preso daude une honetan Sare Herritarrak eman dituen datuen arabera: Mikel Arrieta Llopis, Eider Perez Aristizabal, Juan Manuel Inziarte Gallardo, Jesus Mari Etxeberria Garaikoetxea Goierri, Xabier Goienetxea Iragorri, eta Aitzol Gogorza Otaegi.
Arrieta eta Perez Aristizabal Algeciraseko (Andaluzia, Espainia) espetxean daude etxetik 1.100 kilometrora; 1.000 kilometrora aurkitzen da Goierri ere Cadizko Puerto III espetxean; Inziarte Topas (Salamanca, Espainia) espetxean dago, 470 kilometrora; eta Goienetxea Okzitaniako Mont de Marsan espetxean aurkitzen da, etxetik 140 kilometrora. Gogorza, berriz, etxean dago preso. Sei presoen artean 3.630 kilometro batzen dituzte, joan etorrian 7.260 kilometro egin behar dituzte haien senide eta lagunek astero espetxetarako bidaietan.
