'Ikimilikiliklik', Olatz Salvador, eta hileta bat Lezon
Udazkeneko lehen asteburua oparo dator kulturari dagokionez Lezon. Antzerki eta musika emanaldiak jasoko ditu Herri Eskolako jolastoki estaliak.
Olatz Salvador. Argazkia: Araikamusic. Oparo dator kultur asteburua Lezon. Ostiral, larunbat eta igandean izango da zertaz gozatu. Ostiralean antzerkia, larunbatean musika, eta igandean hileta musikatu bat.
Ostiralean, 20:00etan eta Herri Eskolako jolastokian, Marie de Jongh antzerki konpainiak Ikimilikiliklik obrarekin saioa emango du. Sorginen gaineko lana da, eta besteak beste, 2020ko Feten Saria eskuratu zuen, espazio eszeniko onenaren atalean.
Larunbatean, 22:00etan eta Herri Eskolako patioan, Olatz Salvadorren kontzertua. Bere estilo pertsonala baliatuz publikoaren artean goxotasuna zabalduko du sortzaile donostiarrak. Eskarmentu handikoa da musikaren alorrean Salvador, 2010ean hasi baitzuen bere bidea Skakeitan taldearekin.
Igandean, berriz, Che y Moche Aragoiko konpainiak El funeral antzerki musikatua eskainiko du. Herri Eskolako patioak jasoko du beste behin kultur emanaldia, 20:00etan. Dimitri aitonaren hileta ospatzera gonbidatuko dituzte ikusleak, musikari zingaroen erara.
Emanaldi guztiak doan dira, baina aldez aurretik gonbidapenak eskuratu behar dira Kultura Sailaren bulegoan edo udalaren sarrerak hartzeko web zerbitzuan. Izan ere, eserlekuen muga izango du Herri Eskolako jolastokiak emanaldi horietarako: ikusleek derrigor eraman behar dute maskara.
