COVID-19aren eragina batzorde zabal bidez kudeatzeko EH Bilduren proposamena baztertu egin dute EAJk eta PSE-EEk
Mozio bidez aurkeztu zuen koalizioak proposamena joan den osteguneko udalbatzarrean. Gobernu taldeari erabakia berriz ere pentsatzeko eskatu diote.
Lezoko EH Bilduko zinegotziak, artxiboko irudian. Joan den ostegunean udalbatzarrera bildu ziren Lezoko udalbatza osatzen dute hamahiru zinegotziak. Puntuen artean aztergai EH Bilduren mozio bat: COVID-19ak sortutako krisia kudeatzeko sektore arteko batzordea sortzea eskatzen zuen mozioaren testuak. EH Bilduko sei zinegotziek euren proposamenaren alde egin zuten (sei boto); EAJkoek (sei boto) eta PSE-EEkoak (bat) kontra. Beraz, mozioa ez zen aurrera atera eta herriak ez du izango COVID-19ari aurre egiteko eragile eta sektoreen arteko batzordea. Koalizioko kideen irudiko beharrezkoa da batzordea sortzea.
EH Bilduren ustez, modu komunitarioan aurre egin behar zaio bizi den osasun egoerari. Mozioa ez onartzeak haien ideia ez du aldarazi; kontra, berriz ere deia egin diete EAJri eta PSE-EEri berriz ere pentsa dezatela horri eustea, “iritziz aldatzen badute, gure prestutasun osoa dutela adierazi nahi dugu. Konbentzituta gaude modu komunitarioan arituz gero lortuko dugula larrialdi egoera honetatik ongien ateratzea”.
Ez zen lehen aldia ostegunekoa koalizioak tankera honetako proposamen bat egiten zuena. Oroitarazi dute pandemiaren hasieran (martxoan) elkarlanetik tira egiteko proposamena aurkeztu ziela gobernu taldekoei. Orduko hartan, lehen ezezkoa jaso zuten. Ostegunean, bigarrena.
EH Bilduren intentzioa, batzordeaz ari denean, herriko hainbat eragileren (Lezoko osasun zentroak, hezkuntzakoak, ostalariak eta merkatariak) eta udaleko hainbat sailren (gizarte zerbitzuetakoak, eta beharrezkoak diren guztiak) arteko iritzi, esperientzia eta jakituria partekatuko litzatekeen mahai iraunkorra sortzea da. Udaleko talde politikoen ordezkariak ere leudeke hor. “Batzordearen ardura litzateke, osasun larrialdiak dirauen bitartean horren gaineko erabaki guztiak adostea”, diote ezker abertzalekoek.
Larrialdi egoera osasunetik harago doala baieztatu dute koaliziokideek, alor sozial eta ekonomikoan ere izaten ari den eragina nabarmendu dute. Eta asteek aurrera egin ahala COVID-19aren gaineko geroz eta informazio gehiago badago ere, oraindik ere birusaren bidea ezezaguna dela deritzote: “Horregatik, egoera ezezagun, aldakor eta larri honen aurrean ahalik eta hobekien erantzuteko, eremu askotako eragileen jakintza eta esperientzia oso garrantzitsua litzatekeela uste dugu”. Horiek pilatzeko sektore arteko batzordearen aldeko apustua berretsi egin dute.
