Pasaiako Dantza Festibalak herria berpiztuko du ostegunetik igandera
Igandeko ikuskizunetarako sarrerak dagoeneko agortu dira. Antolatzaileek nabarmendu nahi izan dute oraindik eskura daitezkeela besteetarako gonbidapenak eta "kultura segurua dela".
Pasaiako Dantza Festibalaren bigarren edizioaren aurkezpena, gaur goizean. 
Pasaiako Dantza Festibalaren barne denera sei emanaldi antolatuko dira urriaren 1etik (osteguna) 4ra arte (igandea). Igandeko bi ikuskizunetarako sarrerak dagoeneko agortu direla iragarri du Aiert Beobidek; hark ere, Iurre Aranbururekin batera, aurreko urtean antolatu zuen festibalaren lehen edizioa, eta horren errepasoa egin nahi izan du gaur:
Izan ere, 2019an hamar dantza ordutik gora izan ziren ekimenak barne hartu zituenak, eta 3.000 pertsona baino gehiago bildu zituen dantzak Pasaian. Aurten, baina, osasun eta segurtasun beharretara moldatzeak halako zifrak alde batera uzteko beharra ekarri du; asteburu honetako jardunaldietan argi utzi nahi da kultura segurua dela, eta “pasaitarrok eta kulturak elkarren beharra dugula”, nabarmendu du Beobidek.
Goizean izan den prentsaurreko batean Pasaiako alkate den Izaskun Gomezek “egun berezia” zela esanez agurtu ditu bertan zirenak; Koronabirusak pasaitarren bizitzan zein herriko kulturan izan duen inpaktuak bereziki garrantzitsua egin du “Pasaiari berriro bizitza ematea” eta, horrexegatik, segurtasuna ardatz izango duen bigarren edizio honetara gonbidapena egin nahi izan die bizilagunei.
