'Seabin' itsas-zaborrontziak uste zena baino zakar gehiago jaso du
Pasaiako hondakinak biltzeko gailuak aurreikusitakoa baino zabor gehiago bildu du: 21 kilo hondakin, 10 egunean. Boluntarioak behar dituzte.
'Seabin Pasaia' zaborrontziak bildutako hondakinak, hilaren 8ko goizean zehar. 
Mater Ontzi Museoak hilabete hasieran martxan jarritako Seabin Pasaia gailuak hasiera batean uste zena baino zabor gehiago jaso du Torreatzeko pantalanean (San Pedro). Lehen bilketa aldia irailaren 10etik 20ra arte egin zen, eta egunean 2,12 kilo zakar atzitu zituen, batez beste, itsas-zaborrontziak (21,22 kilo, guztira, hamar egun horietan).
Kopuru horiek ez zituzten espero, proiektuaren hasieran, antolatzaileek, baina horiek zaborrontziaren efizientzia islatzen duela nabarmendu du Materreko lantaldeak: “Gailu txiki baina indartsua dugu, emaitzek erakusten duten bezala!”. Jasotako hondakin gehienak mikroplastikoak izan dira (3mm eta 5mm bitartekoak), baita zigarro-puntak, plastikozko eskularru eta poltsak, eta ontzien tapoiak, besteak beste.
Boluntario bila
Itsas-zaborrontziak hiru helburu nagusi ditu: garbiketa, zientzia eta hezkuntza. Azken biak gauzatu ahal izateko ezinbestekoa da hondakinen tipologia, kantitatea eta jatorria aztertzea, gero herritarren kontzientzia piztu ahal izateko. Lan horretan laguntza behar dutela adierazi du ontziak eta boluntario bila dabiltzala, egunean 1,5 eta 3 ordu artean lan egiteko (edo norberak libre duen tartea, parte-hartze oro baita lagungarri). Interesdunei eskatu diete 690 23 33 55 telefonora dei egiteko edota helbide elektronikora mezu bat bidaltzeko.
