Mendiburu 14ko obrak hilabete gelditu dira, lurra egonkortzeko
Done Eztebe parrokian pitzadura bat agertu dela eta, lanak geldiarazi dituzte. Elizako organoa desmuntatu eta gorde dute.
Elizan artesi bat agertu zen abuztuaren 5ean. Mendiburu 14 eraikin balioanitza eraikitzeko lanak geldirik daude behin-behinean. Izan ere, Done Eztebe parrokian mugimenduak izan ziren, eta pitzadura bat sortu zen abuztuaren 6an. Horren berri eman zuten atzoko plenoan.
Ordutik, lurraren mugimenduak neurtzeko gailuak jarrita daude. Balorazio teknikoa egin ondoren, irailaren 14an obrak hilabete baterako gelditzeko erabakia hartu zuten.
Agustin Lekuona Hirigintza zinegotziak azaldu duenez, hainbat astetan ez da mugimendurik egon, pasa den astera arte. “Hala ere”, jarraitu zuen Lekuonak, “mugimendu txikia izan zen, milimetro batekoa edo”.
Lurrak egonkortzeko asmoz hartu dute eteteko erabakia. Neurketak eta jarraipen lanak egiten jarraituko dute bitartean.
Ondarea zaintzeko asmoarekin, parrokiako organoa desmuntatu du Frantziako Michel Jurine etxeak. Lekuonak gaineratu zuenez, elizako pitzadura ez da izan organoa desmuntatzeko aitzakia; beharra zuen, eta pitzadurak azkartu du prozesua. Horregatik, aurten ez dute Azkue Memorialeko kontzerturik egingo Oiartzunen. Hondarribian eta Irunen izango dira.
