Udal tasa eta zergak ez dira igoko, salbuespen batekin
Oiartzungo Udalbatzak 2021eko zerga eta petxen ordenantza onartu zuen. EAJ abstenitu egin da bozketan, hondakinen tasagatik.
Segurtasun tartea hartuta egin zuten plenoa. Iraileko ohiko plenoa egin zuen atzo arratsean Oiartzungo Udalbatzak. Hamar puntuko gai zerrenda izan zuten mahai gainean, tartean oiartzuar guzti-guztiei dagokiena: 2021eko tasa eta zergen ordenantza.
Aurten ordaintzen den kopuru berean mantentzea proposatu zuen udal gobernu taldeak, KPIa negatiboa izan delako. Salbuespen bat egin zuten: Elorsoro kiroldegiko tasak %2 igoko dira. Jon del Olmo Ogasun zinegotziak azaldu zuenez, kiroldegia kudeatzen duen enpresarekin bideragarritasun plana dute, eta hori betetze aldera igoko dute zerga hori.
Horrez gain, zerga berri baten sorrera iragarri zuen. Azaldu zuenez, urtero zakur asko galtzen dira, eta udaltzainek jaso behar izaten dituzte. Udalari urtean 15.000 eta 20.000 euro kostatzen zaio galdutako zakur horiek mantentzea, jabeak azaldu arte. Horregatik, txakurra galtzen duen jabe bakoitzari kopuru txiki bat ordainaraziko dio udalak.
EAJren abestentzioa
EAJren udal taldeak ez zuen proposamena aldeko botoarekin babestu, nahiz eta tasa eta zergak ez igotzearekin ados dauden. “Aurtengo neurriak badu bere logika, dagoen krisiarekin eta etorriko denarekin”, esan zuen Rafael Bergaretxe zinegotziak.
Abstentzioaren aldeko hautua, beraz, aurreko urteetako gai berarengatik egin zuten: hondakinen tasa. “Hondakinen kontuan desoreka sortzen da. Hori orekatu behar da. Hondakinak sortzen ez dituenak ordaindu behar du. Aurten gaiari ez eustea ulertzen dugu, baina etorkizunean heldu beharko litzaioke”.
Hitzarmena Elizalderekin
Gainontzeko gaiei dagokionez, 2019/2020ko Eskola Kirolako jardueren koordinaziora bideratutako 17.700 euroen hitzarmena aldatuko dute. Elizalde Herri Eskolarekin sinatu zuten hitzarmena, baina eskola publikoek ezin dutenez udalarekin hitzarmenik egin, ikastetxeko guraso elkartearekin egin dute.
Gainera, Behemendi elkartearen estatutuak aldatzea onartu zuten, eta udalaren berezko baliabidea izango da.
