Herriko Plazak hartuko du presoen aldeko aldarria
Argazki bidez eskatuko dute euskal errepresaliatuen etxeratzea, konponbidean, bakean eta elkarbizitzan urratsa aurrera egiteko ezinbestekoa baita preso eta iheslarien korapiloa askatzea dinamikak behin baino gehiagotan adierazi duenez.
Iaz Mikel arrieta eta Aitzol Gogorza larri gaixo diren euskal presoen alde egindako mendi martxa bat. Aldura et Urdaburu mendi tontorretara eraman behar zuten bihar euskal preso eta iheslarien eskubideen aldeko aldarria. Sare Herritarrak baina, bertan behera utzi du deialdi hori, eguraldi iragarpen kaxkarra dela-eta eta Euskal Herriko 650 tontor igo ordez argazki erraldoiak egitera deitu ditu herritarrak. Izan Bidea dinamikaren barruan, beraz, argazki bidez eskatuko dute euskal errepresaliatuen etxeratzea, konponbidean, bakean eta elkarbizitzan urratsa aurrera egiteko ezinbestekoa baita preso eta iheslarien korapiloa askatzea dinamikak behin baino gehiagotan adierazi duenez.
Orereta-Errenteriako sarek ere herriko bi mendi tontorrak Herriko Plazarekin ordezkatu ditu eta elkartasun mendi irteeran parte hartu behar zutenei, horren ordez, bihar larunbata Herriko Plazara ager daitezen eskatu die. Helburua, argazki jendetsua, askotarikoa adinez, kolorez eta sentsibilitatez lortzea. Hitzordua, 12:30ean.
Sei preso, 3.630 kilometro
Oreretako sei euskal preso daude une honetan Espainia eta Frantziako estatuetako espetxeetan sakabanatuta, eta bat etxean zigorra betetzen, Sare Herritarrak eman dituen datuen arabera: Mikel Arrieta Llopis, Eider Perez Aristizabal, Juan Manuel Inziarte Gallardo, Jesus Mari Etxeberria Garaikoetxea Goierri, Xabier Goienetxea Iragorri, eta Aitzol Gogorza Otaegi.
Arrieta eta Perez Aristizabal Algeciraseko (Andaluzia, Espainia) espetxean daude etxetik 1.100 kilometrora; 1.000 kilometrora aurkitzen da Goierri ere Cadizko Puerto III espetxean; Inziarte, Topas (Salamanca, Espainia) espetxean dago, 470 kilometrora; eta Goienetxea Okzitaniako Mont de Marsan espetxean aurkitzen da, etxetik 140 kilometrora. Gogorza, berriz, etxean dago preso. Sei presoen artean 3.630 kilometro batzen dituzte, joan etorrian 7.260 kilometro egin behar dituzte haien senide eta lagunek astero espetxetarako bidaietan.
