Hogei familia etxetik irtenarazi dituzte Trintxerpen, egitura-kalteengatik
Atzo 21:00ak aldera hustu zituzten etxebizitzak. Teknikariek segurtasuna berma daitekeela ziurtatu arte udaltzaingoaren patruila bat egongo da 24 orduz bi atarien sarbidea kontrolatzen.
Orain dela 16 urte pitzadura berdinengatik ere arazoak egon ziren eraikinean. Artxibo irudia. 
Trintxerpeko Jaizkibel kaleko 9 eta 11 atariak hustu behar izan dituzte bi eraikinek komunean duten egituran atzeman diren kalteengatik; guztira 20 familia irtenarazi dituzte euren etxeetatik, Pasaiako Udaltzaingoak iragarri du teknikariek lanean dihardutela: “Segurtasuna berma ote daitekeen ziurtatu beharra dago, teknikariak bilduta daude baina oraindik ez dakigu noiz bueltatu ahal izango diren familiak etxera”.
Astelehenean hustu zituzten etxebizitzak lehen aldiz, eraikineko lehen solairuan dagoen supermerkatuko langileek pitzadura baten berri eman ziotenean udaltzaingoari; teknikariek erabaki zuten segurtasun lanak gauzatu arte bizilagunek etxea utzi beharko zutela. Zutabeko pitzadurak berehala habetu eta egun hartan bertan bueltatu ahal izan ziren trintxerpetarrak euren etxeetara: “Teknikariek burututako txostenak adierazi zuen segurtasuna bermatuta zegoela”, adierazi du udaltzaingoak.
Atzoko egunean, baina, eraikinaren egituraren egonkortasunaren gainean zalantzak berpiztu ziren eta beheko establezimenduak kontratatutako arkitektoak adierazi zuen egitura ez zela segurua. Horren aurrean, gaueko 21:00ak inguruan bizilagunei adierazi zitzaien ezinbestean etxeak hustu beharko zituztela, noiz arte jakin gabe. Senide edo lagunen etxera joan ezin izan zirenei emergentziazko zerbitzuek eman zieten ostatu, nahiz eta argi utzi duten gau baterako neurria izango dela hori.
Bizilagunek euren ezinegona adierazi dute, batik bat, ezjakintasunagatik. Gainera, orain dela 16 urte antzeko arazo bat egon zen eraikinean eta orduan behean zegoen Kutxaren lokalean zutabe guztiak sendotu zituzten, goiko etxeen ‘gainkarga’ izan zitekeenari eutsi ahal izateko. Antza denez, orduan gauzatutako lanak ez dira aski izan urteekin nabarmenagoa egin den pitzadura eteteko.
Udaltzaingoaren patruila 24 orduz
Bi atarietara sarbidea galarazteko Pasaiako Udaltzaingoaren patruila bat dago orain Jaizkibel kalean, 24 orduz. Bizilagunak “momentu puntualetan” sartu ahal izango dira euren etxeetara, banan-banan betiere, eta ahalik eta denbora laburrena igaroz barruan: “Guk herritarren segurtasuna bermatu behar dugu”, nabarmendu nahi izan dute segurtasun agintariek.
