Pentsio duinen aldeko aldarria, kalean berriro
Politikari eta erakundeei eskaera zehatza, beste behin ere, berma ditzatela beharrezkoak diren politika publikoak eta baliabideak adinekoek ez dezaten pobrezian bizi behar, emakume alargunek izan dezaten bizitzeko lain emango dien pentsioa, zaharren egoitzetan arreta egokia izan dezaten bitartekoak eta pertsonala bermatzea baita osasungintza publikoan ere.
Duintasuna jubilatu eta pentsiodunen elkarteak kalea hartu du gaur berriro. Udako etenaldiaren ostean, gaur egin dute ikasturte berriko lehen batzarra eta manifestazioa. Ikasturte berrian ikasgaiak zahar, urte luzeetan hileko lehen astelehenero egin duten moduan, gaur ere aldarri berberekin hartu dituztelako kaleak: zahartzaro duin baterako eskubidea, 1.080 euroko gutxieneko pentsioa, pentsio sistema propio eta publikoa, osasungintza publiko eta kalitatezkoa… Arazo larria bazen aurretik, COVID-19aren pandemiak agerian utzi du aldarrikapen horiek betetzea oinarrizkoa dela, zahartzaro duin bat bermatuko bada.
Ikasturte berria, eta betikoek ikasgaia gainditu gabe jarraitzen dute. Politikari eta erakundeei eskaera zehatza, beste behin ere, berma ditzatela beharrezkoak diren politika publikoak eta baliabideak adinekoek ez dezaten pobrezian bizi behar, emakume alargunek izan dezaten bizitzeko lain emango dien pentsioa, zaharren egoitzetan arreta egokia izan dezaten bitartekoak eta pertsonala bermatzea baita osasungintza publikoan ere.
Eta balantzaren beste aldean, eskubideen aldeko aldarriei entzungor egiten dietenen aurrean, beraien mugimenduaren izenak ongi azaltzen duen bezala, Duintasuna. Bertan ari diren asko eta asko dira eskubide sozial, zibil eta politikoen lorpenerako lanean aritu zirenak 1960. hamarkadan eta hortik aurrera; beraiek dira, 60 urte geroago zahartzaro duin baten alde, orainaldi eta etorkizun duin baten alde kaleak hartu dituztenak.