Euskaraldiaren aurkezpen ikuskizuna egingo dute ostegunean, Antxon
Ostegun honetan (hilak 8) Pasai Antxoko Ibaiondo frontoian Euskaraldiaren aurkezpen ekitaldia egingo dute, 19:00etan; umorea, antzerkia eta dantza egongo dira. Gonbidapenak aurrez eskuratu behar dira.
Datorren ostegunean (hilak 8) arratsaldeko 19:00etan Pasai Antxoko Ibaiondo frontoian Euskaraldiaren aurkezpen ekitaldia egingo dute. Badator Euskaraldia! izenez ezagutzera eman duten egitasmoa azaroaren 20ean hasi eta abenduaren 4ra arte egingo da, hamabost egunez gure inguruko hizkuntz-ohiturak astindu eta “euskara gehiago, gehiagorekin eta gehiagotan egiteko”.
Osteguneko ekitaldira bertaratzeko aurretik gonbidapena (doakoa) eskuratu beharko dute interesdunek, honako establezimendu hauetan:
- Antxo: Urdin liburu-denda, Rome taberna eta Lizeoko idazkaritza.
- Trintxerpe: Santamaria arrandegia eta Maite taberna.
- Donibane: Pari Berri taberna eta Iciar taberna.
- San Pedro: Isasa paper-denda eta Begihaundi taberna.
Antolatzaileek gogorarazi nahi izan dute norbanakoen izen ematea zabalik dela, eta dei hori osteguneko ikuskizunarekin zabaltzea da asmoa; ildo horretan, Hamaika Buelta antzerki taldeko kideek umorea eta antzerkia elkartuko dituzte frontoian. Horrez gain, Pasaiako dantzari talde ezberdinek Euskaraldirako espresuki sorturiko Bihurguneak abestiaren koreografiarekin itxiko dute ekitaldia. Ibaiondora hurbildu ezin duenak zuzenean ikusi ahal izango du aurkezpena YouTubeko Euskaraldia Pasaia kanalean.