Gaur Iturriotz eta Karrikan egingo dituzte auzo batzarrak
Ergoien, Ugaldetxo, Altzibar eta Elizalden egin dituzte auzo batzarrak. Gaur eta bihar izango dira gainontzeko saioak.
Ugaldetxoko bizilagunek udaletxean egin zuten batzarra, atzo [Arg.: Oiartzungo Udala].
Oiartzungo Udalak antolatzen duen auzo batzar sorta erdibidean da. Astelehenean Ergoien eta Ugaldetxoko bizilagunekin egin zituzten, atzo Altzibar eta Elizalde auzoen txanda izan zen, eta gaur iturrioztarrekin eta karrikatarrekin elkartuko dira udaleko ordezkariak.
Bi bilerak 19:00etan hasiko dira. Iturrioztarrek udaletxeko pleno aretoan izango dute hitzordua, eta bertara joateko Xorrola hartzera animatu ditu udalak. 18:48an pasatuko da Ibarretik, eta 18:49an Bidezarratik.
Karrikakoek, berriz, beraien auzoan izango dute auzo batzarra. Artaso elkartean izango da. Biharko bilerak Arraguakoentzat (udaletxean; autobusa 18:40an) eta Gurutzekoentzat (Bizardia elkartean) izango dira.
Bilerek edukiera mugak izango dituzte eta aurrez lekua erreserbatzea gomendatu du udalak. Horretarako e-posta bidez postara idatzi beharko da, edo 943 49 18 62 telefono zenbakira deitu.
Urteroko bilera sorta izaten da, udalak bere aurrekontu eta proposamenak aurkeztu eta auzotarrenak jasotzeko.
