Hilaren 18an atsolorra egingo diete 2019an jaiotako oiartzuarrei
Martxoaren bukaeran egin behar zuten ongietorria, baina atzeratu egin behar izan dute. Neurri bereziekin egingo dute aurtengo ekitaldia.
Zuhaitzaren irudikapena ez da faltako [Arg.: Oiartzungo Udala].
Hurrengo igandean —hilak 18—, 2019an jaiotako haurren atsolorra ospatuko dute, haurren gurasoek eta udalak antolatutako ekitaldian. Iaz Oiartzunen jaio ziren 70 haurretatik 31k parte hartuko dute komunitatera ongietorria ematea sinbolizatzen duen familia giroko festan.
COVID-19ak sortutako osasun larrialdi egoera dela eta, martxoa bukaeran ospatzekoa zen atsolorra, udaberriaren etorrerarekin batera. Bertan behera geratu zen, baina bai udalak eta bai gurasoek, aukera izatean atsolorra ospatuko zutela argi zutela jakinarazi dute.
Datorren asteko saioa, hala ere, ez da ohiko atsolorra izango, egoerak baldintzatuta. Atsolorraren ezaugarri nagusiak mantenduko ditu (harrera, txalaparta, haur jolasak, zapiak eta zuhaitza osatzea), baina aldaketa nabarmena izango du: edukiera mugatua.
Hori dela eta, haur bakoitzarekin bi senidek parte hartuko dute festan. Arizmendi-eneko lorategian izango da ospakizuna, espazio irekia baita. Eguraldi txarra eginez gero, udaletxeko areto nagusian, bi taldetan banatuta.
