Andoni Dominguez, tximista bezala Nafarroan
Zirkuitu handi bateko lasterketa batean parte hartzen zuen lehen aldian, larunbateko eta igandeko txandak irabazi ditu lezoarrak.
Dominguez, asteburuan, Los Arcosen. Andoni Dominguez Martinez 11 urteko motor pilotu lezoarra geldiezin dabil. Asteburuan, lehenengoz, zirkuitu handi batean egindako lasterketa batean parte hartu zuen. Larunbatean eta igandean egin zituzten bi probak: bietan garaile izan zen. Espainiako Estatuko erkidegoen arteko txapelketako azken aurreko proban parte hartu zuen lezoarrak, Moto5 kategorian (250 zentimetro kubikoko motorrak dira), Nafarroako Los Arcos herriko zirkuituan. Lehen aldia zen zirkuitu handi bateko lasterketa batean parte hartzen zuena, eta irabazi. Ez nolanahi: aurrean 15 urtera arteko pilotuak zituen, gainera, eskarmentua dutenak kategorian.
Los Arcos hurbil dagoelako joan ziren Dominguez eta haren senideak Nafarroara lehiatzera. Proba antzekoa izan da asteburukoa. Izan ere, euren asmoa da hurrengo urtean kategoria horretako lasterketa guztiak egitea. Baina txapelketa osoari aurre egiteko laguntza ekonomikoa behar dute, babesleak behar dituzte. Hortaz, pilotuaren aitak, Goio Dominguezek, interesa dutenei dei egin die haiekin harremana egin dezaten asteburuan babeslerik eta pegatinarik gabe izan den motorrak, hurrengo sasoian beste kolore bat izan dezan.
Minimotard 85
COVID-19ak motoziklismoan ere eragina izan duen arren, aurten lezoarrak egin duen txapelketa oso bakarra Gaztela Leongo Minimotard 85ekoa izan da. Kategoria horretan 85 zentimetroko kubikoko motorrak erabiltzen dituzte partaideek, eta zirkuitu mistoetan ibiltzen dira (asfaltoa eta lurra nahasten dira, hortaz, motorrak ere horretara egokituta daude). Zirkuituak ez dira asfaltoko handi horiek bezalakoak, laburragoak izaten dira.
Gaztela Leongo horretan hirugarren izan da sailkapen nagusian Dominguez, baina beti kontuan hartu behar da kategoriako gazteenetakoa zela lezoarra, 13 urtekoak dira pilotu gehienak.
