Antxo AF finalerdietan kanporatu dute Euskal Kopatik, penaltietan
Antxoko areto futbol taldeak larunbatean jokatu zuen finalerdia, Eskoriatzako kiroldegian. Bigarren zatian galtzen zihoazela berdinketa lortzeko borrokatu ondoren, penaltietan kanporatu zituzten.
Antxo AF areto futbol taldeak pasa den larunbatean jokatu zuen Euskal Kopako finalerdia Eskoriatzako kiroldegian, Ortxabe (Otxarkoaga, Bilbo) taldearen aurka. Aurreikuspen guztien aurka, 5-5 berdinketa lortu zuten antxotarrek partida amaitzeko 0,9 segundo falta zirenean; penaltien txandan, baina, zuri-gorriek ez zuten asmatu eta kanporatuak izan ziren lehiatik.
Aurkariak Bigarren B Mailakoak ziren (Antxo AF baino maila bat goragokoa, alegia), eta hori jakinda pasaitarrek argi zuten, lehia aurretik, onena eman beharko zutela garaipena lortu nahi bazuten: “Denok espero genuen partida on bat egitea, baina taldeak eman zuen maila ikusgarria izan zen”, aitortu dute Facebooken. Lehiako lehen jokaldian aurrea hartu zuten, baina Ortxakoagakoek ez zieten tregoarik eman, “beraien erasoak oso azkarrak ziren eta gol aukerak sortu zizkiguten markagailuari buelta emanez”. 3-2 amaitu zen lehen zatia, antxotarrak atzetik.
Atsedenaldiaren ostean presioa igo eta ausardiaz jokatu zuen baloia Antxo AFk, berdinketa lortuz. Azken bost minutuetan markagailuak su hartuko zuela zirudien, 4-3ko gola sartu baitzuen Ortxabek, eta 5-3koa minutu bat geroago. Zuri-gorriek, baina, bazekiten munta handiko partida zela hura, eta aitortu dutenez, “orduan taldeak azken esfortzua egin zuen, atezain nahiz jokalariekin”; hiruzpalau gol aukera garbi izan ostean, 13 segundoren faltan, azken-aurreneko tantoa markatu zuten. Erditik atera eta luze jokatu zuten baloia denbora bukatzeko, atezainak baloia eskuratu, lurrera bota eta beste zelaira iritsi zenean, pasea egin eta 0,9 segundo gelditzen zirela antxotar zaleak aztoratu zituen berdinketa lortuta.
Penaltietan, baina, ez zuten asmatu eta Otxartabek 0-2ko garaipena eskuratu zuen. Antxo AFk eskerrak eman nahi izan dizkie, bereziki, bertaratu ziren zaleei eta baita partida online jarraitu zuten horiei ere, “egunero zuen berotasuna eskaintzen diguzuen guztioi”. Harrotasunez adierazi dute onena eman zutela jokalariek: “Beste behin erakutsi genuen taldeak inoiz ez duela amore ematen”.