Musika elektronikoaren jaialdia Pasaiako uretan hasiko da
Aurtengo Dantz Point Gipuzkoa festibalak sei DJ saio eskainiko ditu, haietan lehena, bihar, 'Lucretia' belaontzi klasikotik. Emanaldi guztien jarraipena online egin ahal izango da.
'Lucretia' belaontzi klasikoa. Argazkia: Oarsoaldea Turismoa. 
Aurtengo Dantz Point Gipuzkoa musika jaialdia ezohikoa izango da, guztiz: Koronabirusak eragindako egoerari egokituz, nork bere etxetik jarraitu ahal izango ditu eskainiko diren sei DJ saioak, baina artistak ez dira edonon egongo, baizik eta Gipuzkoako gune esanguratsuenetako batzuetan: Besteak beste, Zumaiako flyscha, Loiolako santutegia (Azpeitia), Aizpea meategia (Zerain), eta, guztietan lehena, Pasaiako badia.
Bihar (asteazkena) emango zaio hasiera jaialdiari 1927. urteko ‘Lucretia’ belaontzi klasikotik; bertan izango da Ibailo, zeina, DJa izateaz gain, itsasontziaren patroia ere baden. Gainontzeko musika saioak azaroaren 10ean eta 24ean, eta abenduaren 9an eta 22an izatea aurreikusi da, nahiz eta oraindik emanaldi guztiek ez duten kokapena esleituta. PiztuKultura iniziatibaren barne kokatzen den jaialdi honek, COVID-19ak kulturaren sektorean eragindako galerak arintzea dauka xede.
